اخبار الفن

انا إنسان منحوس.. شريف دسوقي يوجه رسالة مؤثرة لجمهوره بعد بتر قدمه

وجه الفنان شريف دسوقي، رسالة إلي متابعيه وجمهوره بعد بتر قدمه من خلال إعادة منشور عبر صفحته الخاصة على تطبيق موقع التواصل الاجتماعي فيس بوك.

وقال شريف دسوقي: “انا المثال للشخص اللى ممكن تشوفه من وجهة نظرك منحوس، يوم ماالدنيا ابتسمتلى رفعت ايديها بكل قوتها ونزلت على وشى وفوقتنى من وهم السعادة اللى عيشتنى فيه”.

وتابع شريف دسوقي: “حلم حياتى اكون معروف ومشهور وموجود فى وسط الحاجة اللى بحبها وبعد تعب وشقى سنين قدرت، قدرت اعمل كل اللى بحلم بيه، واخلى الناس كلها تشوفنى فى كل موقف بيقابلهم فى حياتهم، قدرت اسببلهم سعادة بسيطة هى جزء رئيسى من طموحى، ربنا وهبلى القبول والناس حبتنى زى ما حبتهم لكن مفيش حاجة بتدوم.. وكل العجب ان الحاجة والسبب الرئيسى فى صعودك تكون هي الضربة القاضية اللى تنهى كل امالك وتقضى عليك نفسيا”.

وأضاف: “ابتديتها من تحت الصفر، طول عمرى بشقى وبتعب ومحدش حاسس بيا ولا حد واخد باله منى، مستنى نص فرصة انى اثبت انى موهوب وموجود واد ثقة الناس اللى هتشوفنى، سنين من عمرى راحت وانا بجرى من مكان لمكان ادور على دور ينصفنى ويشيل الغيامة من على عيون كل اللى حواليا واثبتلهم اد ايه انا فنان كبير وتقيل اوى فى مجالى”.

وأشار: “الفرصة جتلى جتلى فى دور مكنتش اتوقع انه ينجح ربع النجاح اللى وصله، فضل ربنا كبير عليا خلانى محط انظار الناس كلها بدور ممكن اى حد يأديه واللى حواليه ميحسوش بيه.. الدنيا طبطبت عليا اوى بحب الناس ليا ونظراتهم وتقديرهم للنجاح اللى قدرت احققه وبعد النجاح ده قررت انى اخد الدنيا بالاحضان واعمل ادوار وادوار تتخلد فى تاريخ السينما والناس تفتكرنى بيها للابد
مكنتش اعرف أن طعنه الغدر هتيجي وسط الدور اللى كان سبب فى قلب حياتى من ضلمة لنور جرح صغير فى رجلى وسط مشهد صغير قدر انه ياخد البناية اللى بنيتها لسابع سما وينزل بيها لسابع ارض، متعودتش فى حياتى ان المرض يهزمنى وعندى يقين من ربنا ان مفيش اى حاجة بتحصل فى حياتى الا وكان ليها سبب ومعنى ومغزى واكيد شايف ان ربنا شايلى الاحسن وان اللى حصل ده خلانى اشوف حب اللى حواليا واهتمامهم وتقديرهم ليا رغم انى اللى قدمتوا ليهم قليل.. واعتقد ان ده تصديقا للقول، من احبه ربه، حبب فيه خلقه، هرجع وهكون اشد واقوى من الاول ، هرجع وهشتغل ومش هخلى حياتى تقف ابدا على حاجة، هحاول لحد اخر نفس فيا هرجع وعارف ان الناس اللى بتحبنى فى ضهرى هرجع علشان اسعدكم وعلشان اسيب جواكم ابتسامة وسعادة اتمنيتها ليكم طول حياتي”.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى