محمد العدل يشيد بمخرج فيلم “ريش”: رفع اسم مصر في الخارج

أشاد المخرج محمد العدل بالمخرج عمر الزهيري الذي أثار جدلا واسعا بعد نجاح فيلمه “ريش” والحائز على جائزتين من مهرجان “كان” السينمائي الدولي.

وقال “العدل” عبر حسابه الشخصي على موقع التواصل الاجتماعي فيس بوك: “حتي لو الفيلم مش عاجبك ومش شبه ذوقك، ده ميقللش من حجم الانجاز انه اخد جائزتين من مهرجان كان لأول مرة في تاريخ السينما المصريه”.

وأضاف: “ميمنعش أن احنا المفروض نتشرف بعمر الزهيري وقبله سامح علاء اللي رفعوا راسنا و رفعوا اسم السينما المصريه في أكبر محافل السينما بالعالم.. لكن ازاي نفرح ونتشرف !؟؟ عيب طبعا نفرح، احنا اصلا مبنعرفش نفرح ولا لنفسنا ولا لحد”.

وتابع: “لازم المخرج يبقي نيته وحشة والفيلم ممول ونظرية المؤامرة تشتغل والاحقاد والغل وكل اللي مالوش شغلانة أصلا يطلع يقطع في مخرج شاب و يقلل منه.. اللي عملوه عمر الزهيري وسامح علاء زي اللي بيعملوا محمد صلاح بالضبط.. رفعوا اسم مصر في الخارج، واسمهم اتحفر في التاريخ”.

واختتم رسالته قائلا: “واتمني يطلع ناس تانية كتير زي النماذج المشرفة دي، احنا هنا اللي بياخد جائزة من مجلة محليه، بيتتنك علي الوسط والناس فما بالك بمهرجان كان بقي.. انا فخور بيك يا عمر يا عشرة اكتر من ١٥ سنه وربنا يحميك وينجحك ورجعتني تاني لقعدتنا علي سلالم المعهد أيام ما كنا بنحلم ونفكر.. الجوايز اللي ربنا كرمك بيها يا عمر سينمائيين كتير في العالم بيحلموا بيها و يتمنوها، خليك دائما فخور بنفسك وأبطالك والفنيين اللي كانوا معاك ولا يهمك من اي حد، مستني فيلمك الجاي، وسيري يا نورماندي”.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *