كشف الفنان فتحي عبد الوهاب، أنه سعيد بمسيرته الفنية الطويلة، ولم يندم مرة واحدة على أي دور قدمه أو أي مشهد، معلقًا:"كله سعيد به، لأننا نأخذ القرارات بناءً على خبراتنا، وبناءً على المعطيات حولنا في هذا الوقت، وبالتالي هو طريق لازم نمشيه مش بمزاجنا".

وتابع، خلال لقائه في برنامج "كلمة أخيرة" على قناة ON مع الإعلامية لميس الحديدي:"كل دور وله ظروفه الموضوعية، وكل وقت له أسبابه".
فقاطعته الحديدي متسائلة:"عمرك اتزنقت وشعرت إنك محتاج لدور ولازم تشتغل؟"ليرد: "حصلت مرتين... شاركت مجاملة."لتقاطعه مجددًا:"ماقصدش مجاملة، أقصد زنقة مادية؟"فيرد:"محصلش، عمري ما اتزنقت ماديًا وقدمت أدوار، ولا بحسبها بالطريقة دي".
وعن كون المال ليس من أولوياته، علّق:"الفلوس مهمة لأي حد، لكنها مش أهم حاجة عندي ليست الغاية الاهم . الأهم منها هي الصحة، وده الأساس".

وحول مصدر السعادة، قال:"السعادة مش قاصرة على الفلوس. الفلوس أحد العوامل، لكنها مش كل العوامل اللي بتحقق السعادة".
وردًا على سؤال الحديدي:"متى تشعر إنك راضي؟"قال:"لما أكون عملت اللي عليا في أي حاجة، سواء شغل أو حياتي أو تجاه أي حد. طالما عملت اللي عليا وخلاص، مهما كانت النتيجة".

وعن إطراء الناس وهل يمثّل مصدر سعادة له، قال:"إطراء الناس المفروض يسعد، لكنه بيسببلي رعب أكبر، لأن سقف التوقعات بيبقى أعلى مني، وأكتر حاجة بترعبني هي الخذلان، علشان كده دايمًا بحاول يكون في حد أدنى ما انزلش عنه".