تابع أحدث الأخبار عبر تطبيق

أنا مش ملاك

ولا كنت نسل الأنبيا

ولا مسني م المعجزات غير الأمل

والشعر لما يمسني وأهز جذع المعني

يتنزل صور

قلبي براااااح يشبه وطن

بشجون تفوق المحتمل

ساحة خلاص بتضمكم

والقلب من بدري انفطم على حبكم

درويشة من زمن الوفا

بردانة بتوزع دفا

قلبى العليل 

ويله من الأحباب ويلين

اناكنت بضحك وسطكم من غير ما اخاف

زودتوا ليه حملي على سنيني العجاف

قدمت خير

تستعموا ليه قلبى البصير

كل اللى فزتم بيه هباء

بالنسبة للى هتخسروه مني قليل 

وانا مش ملاك

سيف الحياء قطع من اكتافى الكتييييير

وما عدش باقى م القليل الا القليل 

ويدوب يقيم صلب اللى باقى م الحياة

أنا مش ملاك                  

أنا زيكم بغضب وأثور

والعن ابو الطيبة على وخز الضمير 

على يوم ما بعزقني الحنين فى وصلكم 

وانا ف الأساس موجوع  كياني بعجزكم

يصعب عليا بالعتاب اكشفكوا قدام نفسكم 

وحياة ذكائكوا بضعفكم 

وحياة غبائي بحبكم

وحياة غلاوتي ف كدبكم

تتوارو ا حتى بالمجاز

لا أنا عمري كنت مغيبة

ولا بيتي عمره كان إزاز

انا مش ملاك

وكفرت بيكم من زمن

من دم قلبى للقلم كان المداد 

يكتب نهاية عهدكم

قلبى اللى حبلان بالعتاب

يوم الفراق يولد كلام ممسوخ مشوه للوداع 

يادى الغباء

مين زيكم

قدمتوا سيف السبت يعدم حدكم

خسركوا حب الإمتلاك

وانا مش ملاك

■ هالة عصفور، ليسانس أداب قسم تاريخ جامعة المنصورة، باحثة ماجستير بقسم التاريخ الإسلامي بجامعة المنصورة. حصلت على المركز الثاني في الشعر  على مستوي جامعات مصر أثناء دراستها الجامعية، والمركز الأول في مهرجان سقراط للشعر والنقد  عام ٢٠١٧. عكفت لمدة  أربع سنوات على كتابة تاريخ مصر شعرًا منذ قيام الحضارة على ضفاف النيل وظهور الحضارة الفرعونية، صدر لها خمسة  دواوين شعر بالعامية المصرية. ولها أربعه تحت النشر.