بتخاطب مين في البني أدمين
ناس زي الزرع يحبوا الطين
ناس جوا القلب ونن العين
أو ناس كارهاك من غير أسباب
غيرش نفوسهم مش واضحة
عايشين في الدنيا كما البلالين
بتخاطب ناس
ماشيين ع الأرض يحدّفوا طوب
يهتفوا بضياع ناس شايلة قلوب
ناس شايفة الصورة بالمقلوب
عايشين في الدنيا بوِشّْ حزين
بتخاطب روح
لا بتقدر تتعلم تنسى
ولا قادرة تشيلك في عيونها
ولا فاهمة الماضي وأوجاعه
ولا قادرة تقرر تبني حياة
بتخاطب فيها المستقبل
تاخدك من إيدك بعنادها
ترميك في الماضي اللي ضميرك
مش قادر حتى ف يوم ينساه
بتخاطب عين
شايفاك حمضان، أو حبة أجزاء من إنسان
محطوط على بعضه وأصبح شيء؟
شايفاك مجنون
إنسان معجون حب وإحسان
وياه بتعيش في هدوء وأمان، والقلب بريء؟
شايفاك مين فيهم مش قادر
تفهم وتقرر من أصله
والحب المبني ف أوهامك
جايّة لك تنخر في مفاصله
شايفاك العاقل بالتبجيل؟
شايفاك الشاعر في التسجيل؟
ولا انت خلاص كارتك محروق
وبيمسحوا إسمك بالمنديل؟
الناس مقاسات
ناس فجأة تحبك فجأة ساعات
وساعات كارهاك
ناس ترمي دموعك في السلّات
تكره في لقاك
على ناس لو مهما بتعمل تبقى مش شايفاك
ناس مش مفهومة لا ليها قاموس
وقيمتها فلوس
رجالة تيوس في الطبع قصاد رجالة أسود
رجالة تسد عيون الشمس شُداد العود
ونفوس تقدر تقنع بني أدم
إنه أساسا مش موجود
■ محمود رأفت حصل على المركز الأول بجائزة شيماء الصباغ عن ديوان رقصة على شبر مية ٢٠١٨ والمركز الأول بجائزة بشير عياد لشعر العامية ٢٠١٧، صدر له دواوين: رقصة على شبر مية، التجربة أسرار، ودموع سرقة.
0 تعليق