لو صاحبك بعتلك رسالة عالواتساب أو ماسنجر بيقولك أنا في مصيبة أرجوك إبعتلي 1000جنيه ضروري على الرقم دا.. هتعمل إيه؟ يا ترى هتحولوا المبلغ اللى طالبه منك على طول ولا هتتأكد الأول؟
لو بتستخدم السوشيال ميديا، يبقى إنتَ في دايرة الخطر.. كل يوم بنسمع عن حسابات بتتسرق، ناس بتتخان.. وفلوس بتروح في ثواني.
إزاي بيحصل كده؟ وإيه اللي بيعملوه بالحساب بتاعك لما يسرقوه؟
بص يا سيدي، النصابين دول مش عباقرة.. بس عندهم حاجة قوية.. الصبر والحيلة.. أول حاجة بيعملوها إنهم بيحاولوا يخترقوا حسابك على السوشيال ميديا، زي الفيسبوك أو الواتساب أو الإنستجرام.. بيبعتولك لينك، يقولوا لك مثلا: "ادخل هنا وهتكسب خصم 50% على أي حاجة من الموقع دا! أو "حسابك هيتقفل لو مدخلتش الباسورد بتاعك هنا.. إنت بتدخل الباسورد وفجأة الحساب بتاعك بقى في إيديهم.
وفيه طريقة تانية .. زي انهم ييخلوك تحمّل تطبيق وهمي أو تدخل على لينك فيه فيروس وبكده يقدروا يتحكموا في جهازك كله.. ولو الباسورد بتاعك "123456" أو اسمك وتاريخ ميلادك فأنتَ بتسهّل عليهم المهمة أوي.
طب بيعملوا إيه بالحساب بتاعك؟
لما النصاب يسرق حسابك بيبدأ يستخدمه كأنه كنز.. بيبعثولك رسالة من إيميل وهمي أو رقم غريب يقولوا لك: "حسابك عندنا، لو عايزه يرجعلك حوّل 2000 جنيه على الرقم دا.. ولو إنتَ خفت أو حسابك عليه حاجات مهمة زي صور أو أسرار ممكن تدفع من الرعب.
كمان النصاب بيدخل على الشات بتاعك.. وبيبعت رسايل لكل أصحابك ومعارفك. مثلاً:"يا أحمد، أنا في مصيبة! موبايلي اتسرق ومحتاج 1000 جنيه ضروري. حوّل على الرقم دا وهردهملك بكرة
وطبعًا ناس كتير خصوصا لو جدعان، بيحولوا من غير ما يتصلوا بيك أو يتأكدوا إنك إنت فعلا.
الأغرب ان لو حسابك عليه متابعين كتير ممكن بيبيعوه في السوق السوداء لناس تانية عشان يستخدموه في إعلانات وهمية أو نصب تاني.. و لو حسابك مربوط بحاجات زي الكريدت كارد أو حساب بنكي النصاب بيحاول يستخدم البيانات دي عشان يسحب فلوسك.
طب ايه الطرق اللى بيستخدمها النصابين فى الابتزاز الاليكتروني؟
النصابين بيستخدموا حاجة نفسية جامدة أوي.. هى الخوف والضغط.. مرة مثلا عن طريق التهديد بيقولوا لك: "لو مدفعتش، هننشر صورك الشخصية!" أو "هنبعت لكل أصحابك حاجات محرجة من حسابك.. و بيحطوك تحت ضغط، زي: "حوّل دلوقتي وإلا حسابك هيروح.. عشان ميدوكش فرصة تفكر.. و لما بيبعتوا لأصحابك بيستغلوا إن الناس هتثق فيك وهتحوّل من غير ما تسأل.
طب إزاي تحمي نفسك؟
خلّي كلمة السر بتاعتك معقدة فيها حروف وأرقام ورموز وغيّرها كل فترة.. فعّل خاصية التأكيد الثنائي على حساباتك. يعني لو حد عرف الباسورد، لازم كمان يكون عنده الكود اللي بيجيلك على موبايلك..و لو جالك لينك مشبوه، متفتحهوش، حتى لو من حد تعرفه.. ولو صاحبك بعتلك رسالة غريبة بيطلب فلوس، إتصل بيه أو كلّمه صوت أو فيديو قبل ما تحول ولا مليم..و لو حسيت إن حسابك اتسرق، بلغ السوشيال ميديا بتاعتك (فيسبوك، واتساب، إلخ) فورًا، وحاول تسترجع الحساب.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق