ايه اللي بيحصل في الفيوم وايه حكاية المشروع العملاق في مصر والمنطقة واللي هيعير شكل الزراعة في مصر وازاي المشروع هيكون بديل ذكي للزراعة وتعزيز الأمن القومي الغذائي للمصريين وزيادة التصدير.

مصر عندها امكانيات اقتصادية ضخمة وافكار كبيرة للانطلاق لكن كان ينقصها التمويل أو الفلوس اللي هتعمل بيها المشروعات دي.. لكن مع تحسن الأوضاع الاقتصادية والمالية والتطورات السريعة والنهضة في كل المجالات مصر بدأت تغزو مجالات تانية كتيرة عشان تنوع مصادر دخلها وتدور على طرق تانية للتغلب على الظروف اللي كانت عقبة قبل كده.. زي مثلا مشكلة ثبات حصة مصر من المياه الصالحة للزراعة والشرب واعتمادنا الكلي على نهر النيل..

شح المياه دي كانت من أخطر المشكلات اللي لتواجه خطط التنمية وخاصة في الزراعة وعشان كده الدولة بدأت تستعين بالزراعة الذكية وتطبق افكار عشان تقلل التكلفة وبدأت مشروع زراعة الصوب العملاق في كل أنحاء مصر ولو انت بتسافر على طرق صحراوية هنشوف حجم المشروع دي واللي بيعتبر مستقبل الزراعة في مصر السنين الجاية لان زراعة الصوب يتضمن استهلاك مياه أقل وجودة عالية في المحاصيل وضمان زراعة المحاصيل كمان على مدار السنة وإمكانية التصدير.

عاوز تعرف أهمية مشروعات الزراعة الذكية تعالي نشوف اللي بيحصل في الفيوم... لو قريب من الفيوم هتعرف أن فيه مشروع مزرعة الصوب الزراعية باللاهون على مساحة صحراوية شاسعة تم استصلاحها بالكامل للزراعة حوالي 13 ألف فدان وتم اختيار الموقع بعناية عشان يكون جمب مصادر المياه والطرق والمحاور عشان النقل والتصدير..

مشروع اللاهون بيضم حوالي 2000 صوبة زراعية من النوع متوسط التكنولوجيا تم تصميمها لتلائم طبيعة المناخ المصري وأغلبها مصنع محليا ودي نقطة مهمة جدا وهي إن توطين صناعة الصوب الزراعية في مصر هيقلل التكلفة وهيشغل مصانع تانية والموضوع مش سهل لانه يحتاج لتكنولوجيا ومصانع  ومهندسين وفنيين وحسب البيانات الرسمية تصنيع الصوب في مصر بيوفر25% من التكلفة..

معلومات المشروع بتقول إن آلية عمل الصوب الزراعية بمنطقة اللاهون شغالة بنظام الزراعة الذكية لترشيد المياه لأقصى درجة وإنتاج محاصيل مثالية نقدر نصدرها للخارج ودا اللي بيحصل لأن محاصيل وثمار مشروعات الصوب بيكون مطلوب جدا من الموردين لانها بتكون مضمونة وبعيدة عن الملوثات وظروف الجو القاسية وعشان كده بيكون سعرها أعلي بكتير.

مشروع اللاهون بالفيوم مش مجرد مشروع زراعي لكن نموذج عملاق لشكل الزراعة الجديدة في مصر الفترة الجاية وبيعتبر مجتمع زراعي متكامل وفيه بنية تحتية متقدمة تخدم مراحل الإنتاج والتخزين والتوزيع وبيضن محطة حديثة لفرز وتعبئة المنتجات الزراعية بطاقة 800 طن يوميا وبتستقبل المحاصيل من الصوب، ويتم الفرز حسب معايير الجودة والحجم وتعبئتها طبقا للمواصفات العالمية، تمهيدا لطرحها في الأسواق أو تصديرها إلى الخارج.

مشروع اللاهون بيعتبر كمان  قاعدة لإنتاج تشكيلة واسعة من المحاصيل الزراعية على مدار السنة لتلبية احتياجات السوق المحلي وتعزيز فرص التصدير وزيادة موارد الدولة الدولارية وكفاية تعرف إن الطاقة الإنتاجية المستهدفة للمشروع هتوصل لأكتر من 300 ألف طن في السنة من الخضروات والفاكهة والمحاصيل ودا حضرتك بيكفي احتياجات نحو 3 مليون مستهلك سنويا في مصر ودا بيكشف قد ايه المشروع استراتيجي لمصر وبيعزز أمنها القومي وبيفتح المجال لأفكار جديدة هتجيب ملايين الدولارات.