ضربة جديدة للدولار.. ياترى ايه اللي حصل في الساعات الأخيرة.. وازاي مصر قدرت تحاصر الغول الأمريكي.. وهل انتهت أيام الأزمات الكبرى.. وايه اللي عملته أوروبا عشان تساعد مصر وليه في الوقت دا بالذات.

الاتحاد الأوروبي معروف إنه شريك استراتيجي لمصر واهم شريك كمان للاتحاد في جنوب المتوسط ودا بسبب تشابك المصالح ولأن مصر صمام أمان للأمن القومي الأوروبي كله .. ايوا زي ما حضرتك سمعت كده مصر ليها دور كبير في حماية أوروبا من شرور كتير زي عصابات الجريمة المنظمة في تهريب البشر ووقف طوفان الهجرة غير الشرعية لأوروبا اللي كانت تتم من دول افريقية فقيرة وكمان لأن أمن مصر من امن أوروبا لأن أي توتر في الشرق الأوسط بيقلق أوروبا بشكل كبير ودا لأنها عاوزة تحافظ على مستوى الرفاهية اللي بتوفره لشعوبها.

ولأن مصر صمام أمان المنطقة كلها فكان لازم الاتحاد الأوروبي بدوله ال27 الأعضاء يعملوا علاقات شراكة استراتيجية مع مصر والوقوف جمبها في الأزمات وكمان فيه سبب تاني للدعم الأوروبي لمصر وهو العلاقات القوية اللي بتجمع بين الرئيس السيسي وأغلب قادة القارة العجوز واللي ساهمت في دفع العلاقات بقوة مش كده وبس دا كمان بقي ليها صوت وحلفاء في مراكز صنع القرار في مؤسسات الاتحاد الأوروبي ودي حاجه مهمه جدا لانها بتضمن تطوير مستوى التعاون الاقتصادي مع تالت أكبر كيان اقتصادي في العالم.

طيب ايه الجديد في ملف التعاون مع أوربا وايه اللي حصل في الساعات الأخيرة ؟
شوف حضرتك لو فاكر.. فيه 6 من قادة أوروبا زاروا مصر من كام شهر ووقعوا نيابة عن الاتحاد اتفاقية شراكة استراتيجية مع مصر في كل المجالات ومن بينها التعاون الاقتصادي وتقديم حزم مالية ضخمة بتوصل ل8 مليار يورو ومصر صرفت منها جزء ودلوقتي الاتحاد الأوروبي وافق رسميا علي صرف مساعدة مالية بقيمة 4  مليار يورو بعد موافقة البرلمان الأوروبي ودا معناه أن مصر خلاص هتبدأ تستلم الملبغ الضخم دا وقال الاتحاد في بيان ليه إن المبلغ دا ضمن حزمة لمساعدة مصر لسد احتياجاتها التمويلية وتنفيذ برنامج الإصلاح الاقتصادي اللي مصر نفذت جزء كبير منه بالتعاون مع صندوق النقد الدولي .

ليه التمويل الجديد ضربة إضافية للدولار ؟
عشان ببساطة اي زيادة في التدفقات النقدية الأجنبية بتعتبر انتكاسة للعملة الخضراء وبتقلل الضغط على الدولار في البنوك وبتدي مرونة وقوة للدولة في تلبية احتياجاتها من الدولار بأريحية ومن غير ضغوط شح العملة زي ما كان بيحصل قبل كده وكمان لأن الحزمة الأوربية الجديدة جاية في وقت فيه قفزات كبيرة في إيرادات الدولار من قطاعات الدولة المختلفة زي السياحة وتحويلات المصريين بالخارج والتصدير والاستثمار وعزة قناة السويس وكل قطاع من دا ماعدا قناه السويس حصلت فيه طفرة في التدفقات زي مثلا قيمة التحويلات اللي قفزت الى33 مليار دولار وكل التوقعات بتقول إن الزيادة هتستمر في كل الموارد الدولارية ودا انعكس في الأيام الأخيرة على سعر الدولار اللي نزل ل49.98 جنيه في التعاملات الاخيره بالبنوك وقالت كمان إنه لسه هينزل تاني.