رئيس الصين جاي مصر.. ليه زيارته هتقلب موازين الاقتصاد والأرقام.. وايه حكاية الاستثمارات الصينية الضخمة اللي جاية مع الرئيس وأزاي العلاقات الاقتصادية هتاخد شكل تاني.
التنين الصيني جاي مصر في الأيام الجاية ودي زيارة هتغير موازين الاقتصاد مش في مصر بس لكن في المنطقة كلها.. ليه بقي؟
لأن العلاقات المصرية الصينية في ذروة توهجها وجائزة في شكل تحالف قوي بين بكين والقاهرة على كل المستويات ودا اللي بتاكده حجم الاستثمارات الصينية الضخمة في مصر واللي بتقول إن الصين مش بس جابة تعمل مشروعات ضخمة في مصر لكن دي جاية تعمل صين جديدة في مصر وكيانات صناعية واقتصادية شاملة وبارقام غير مسبوقة لأن الصين بتعتبر مصر دلوقتي رأس الحربة للصناعات الصينية وتسويقها وتوطينها وتصديرها علشان تستفيد من موقعها الجغرافي وبنيتها الأساسية في المواني واللوجستيات والطرق الدولية وقناة السويس .
كمان الصين هتستفيد من قرب مصر من الأسواق وبكده هي هتوفر تكليف نقل وهتساعد في توسيع نفوذ الصين التجاري والصناعي من خلال الشراكة مع دولة مهمة زي مصر وفاكرين من كام يوم لما قلنا هنا في بانكير أن العالم بيعيد تشكيل تحالفاته الاقتصادية بعد وصول ترامب للحكم في الولايات المتحدة ولما قلنا إن مصر هتكون في قلب التحالفات دي سواء مع الصين او مع أوروبا واللي القاهرة مرتبطة معاهم باتفاقيات شراكة استراتيجية شاملة.
الدكتور مصطفى مدبولي رئيس الوزراء قال إن مصر بترحب وبتترقب زيارة الرئيس الصيني لمصر لأنها بتمثل نقلة نوعية في تعزيز العلاقات الثنائية. ومدبولي قال كمان خلال استقباله لي شولي، عضو المكتب السياسي، أمين الأمانة العامة رئيس دائرة الإعلام للجنة المركزية للحزب الشيوعي الصيني، والوفد المرافق له عن تطلعه إلى توجيه جزء من الاستثمارات اللي أعلن عنها الرئيس الصيني للقارة الأفريقية بقيمة تصل إلى 52 مليار دولار خلال منتدى التعاون الصيني الأفريقي إلى مصر.
رئيس الوزراء أشاد كمان بدور الشركات الصينية في دعم مشروعات البنية التحتية، والقطار الكهربائي في مصر بالإضافة إلى تطوير الموانئ ومنطقة الأعمال المركزية بالعاصمة الإدارية الجديدة وإن مصر منتظرة استثمارات صينية كبيرة خاصة في قطاع التكنولوجيا وتوطين الصناعة الصينية المتطورة في كل المجالات خاصة في المنطقة الاقتصادية لقناة السويس، خاصةً صناعات السيارات الكهربائية والهواتف المحمولة ودا بعد نجاح التجربة الناجحة في منطقة "تيدا" الصناعية الصينية، بما يسهم في توطين الصناعة، والاستفادة من الموقع الجغرافي لمصر، وقدرتها على النفاذ للعديد من الأسواق.
كمان مصر هتتعاون مع الصين في القطاع السياحي وزيادة خطوط ورحلات الطيران التبادلية بين البلدين لتشجيع السياحة خاصه بعد إدراج الصين ضمن الدول اللي بتحصل على تأشيرة فورية بمجرد وصول مُواطنيها إلى المطارات المصرية.. يعني زيارة الرئيس الصيني الجاية لمصر هتكون نقلة كبيرة في التعاون الاقتصادي مع ثاني أقوى اقتصاد في العالم وهيحصل طفرة في الاستثمارات الصينية في مصر.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق