يا ترى هو إيه السر ورا ارتفاع معدلات السيولة المحلية في مصر بنسبة 36%، يعني إيه أصلا السيولة المحلية، والقرار ده معناه إيه؟، وإيه انعكاساته على الاقتصاد والمواطن البسيط.

في الساعات الأخيرة، البنك المركزي المصري أعلن إن معدلات السيولة المحلية زادت بنسبة 36%، وده كان في أول 3 شهور من السنة المالية 2025، مقارنة بنفس الفترة السنة اللي فاتت... طب ده معناه إيه؟

ببساطة كده، السيولة المحلية يعني كمية الفلوس اللي بتدور جوه الاقتصاد المصري، سواء كانت كاش في إيد الناس أو في البنوك أو حتى ودائع، يعني الفلوس الجاهزة اللي تقدر تستخدمها في الشراء أو الاستثمار.

ولما السيولة تزيد، ده معناه إن فيه فلوس أكتر في السوق، بس السؤال المهم: هل ده خبر حلو ولا خطر؟

طبعا، الزيادة الكبيرة دي، وواللي وصلت 36%، حصلت بعد ما الحكومة والبنك المركزي عملوا إجراءات إصلاحية كبيرة، زي تحرير سعر الصرف واللي حصل في مارس 2024، وده كان له تأثير مباشر على الاقتصاد، لأن التحرير ساعد على تقييم الأصول الأجنبية بشكل أدق، والبنوك كمان بدأت تعوّض النقص اللي كان موجود في احتياطي النقد الأجنبي.

ومن ساعتها، صافي الأصول الأجنبية في البنوك زاد لأول مرة من فترة طويلة، وده معناه إن فيه عملة صعبة دخلت البلد، سواء من استثمارات أجنبية أو من تحويلات المصريين في الخارج اللي رجعت ترتفع تاني.

لكن السيولة الكتير مش دايمًا معناها خير، لأنها ساعات بتسبب تضخم لو الفلوس زادت من غير ما يقابلها إنتاج حقيقي، عشان كده البنك المركزي بيحاول يوازن الأمور، ورفع أسعار الفايدة أكتر من مرة خلال سنة 2024، عشان يسحب شوية من السيولة دي ويقلل الطلب شوية، وبالتالي يسيطر على الأسعار.

يعني البنك المركزي بيقول للناس “اللي معاه فلوس، خليه يحوشها في البنك وياخد عائد كويس، بدل ما يصرفها بسرعة فتغلى الأسعار”.

طيب والمواطن البسيط؟ ده يهمه في إيه؟

بص يا سيدي، لو السيولة دي زادت بشكل متوازن واحتياطي النقد الأجنبي اتحسن، ده يدي ثقة أكبر في الاقتصاد، ويخلي الجنيه المصري يبقى أقوى، وكمان الأسعار ممكن تثبت أو حتى تنزل شوية، لكن لو السيولة خرجت عن السيطرة، الأسعار ممكن تغلي، وساعتها المواطن هو اللي بيتأثر في الآخر.

عشان كده البنك المركزي بيشتغل على معادلة صعبة، وهي إنه يزود السيولة علشان يشجع الاستثمار، بس في نفس الوقت يسيطر عليها علشان مايحصلش تضخم.

والمعادلة دي لسه مستمرة، وكلنا لازم نتابع ونفهم، لأن الاقتصاد مش بعيد عن حياتنا، هو اللي بيحدد قوتنا الشرائية،، البنزين، الفايدة على الودايع، وسعر الدولار كمان، وأسعار الأكل والشرب كمان، عشان كده لازم نتابع المؤشرات أول بأول.