يا ترى إيه طبيعة عمل الشركة الصينية اللي ناوية تقتحم السوق المصري من أوسع أبوابه، هتدخل تشتغل في إيه وهتعمل إيه بالظبط، وشكل استثمارات إيه، وإزاي ده هيأثر على الاقتصاد؟ ومين المستفيد؟

في خطوة جديدة بتأكد إن مصر بقت مركز جذب للاستثمار الأجنبي، في شركة صينية اسمها "هايتكس" قررت تعمل مصنع لصناعة الأقمشة الزخرفية في منطقة القنطرة غرب الصناعية، وهيكون باستثمارات 17 مليون دولار، يعني حوالي 850 مليون جنيه مصري.

والمصنع ده هيشتغل على مساحة 65 ألف متر مربع، وهيوفر 300 فرصة عمل مباشرة، وهينتج أكتر من 20 مليون متر أقمشة في السنة، واللي أحلى من كده؟ الإنتاج كله للتصدير بنسبة 100%، يعني دخول عملة صعبة، وزيادة الصادرات.

بس ليه القنطرة غرب؟

رئيس الهيئة العامة للمنطقة الاقتصادية لقناة السويس، وليد جمال الدين، قال إن القنطرة غرب بقت قصة نجاح حقيقية في جذب الاستثمارات، خصوصا في قطاع المنسوجات والملابس، ودي مش أول شركة تستثمر هناك، لأ ده المنطقة فيها دلوقتي 20 مشروع صناعي، بإجمالي استثمارات 596.5 مليون دولار، وبتوفر أكتر من 27 ألف فرصة عمل مباشرة!

طيب ليه الشركات الصينية بتختار مصر؟

ببساطة كده، لأن تكلفة العمالة عندهم بقت عالية، فالعمالة المصرية عبى قد الإيد، وكمان بيحتاجوا يصدروا للأسواق العالمية بأقل تكلفة، ومصر موقعها حيوي بين أوروبا وأفريقيا، وكمان عندنا بنية تحتية قوية، وعمالة مدربة، وتسهيلات ضخمة للمستثمرين، عشان كده اختارونا.

يعني المصنع بدل ما يبقى في الصين ويواجه جمارك ضخمة لو صدر لأمريكا أو أوروبا، لأ، يتعمل في مصر ويتصدر على طول، ودي مش أول مرة نشوف ده من الصين، عندك مثلا شركة أوبو قررت تحول مصانعها في مصر لمركز رئيسي بعد الصين، وكمان شركة GAC أعلنت عن استثمار 300 مليون دولار، والصين نفسها أعلنت إنها ناوية تزود استثماراتها في مصر خلال السنة دي 2025.

طيب المواطن العادي بيستفيد إزاي من المشروعات دي؟

بص يا سيدي، أول استفادة هي وظائف مباشرة وغير مباشرة، وكمان زيادة في الصادرات يعني عملة صعبة تدخل البلد، وده بيقلل الضغط على الدولار وبيقوي من الجنيه المصري، وكمان كل ده بيساعد على استقرار الأسعار والتضخم، غير إن ده بيحرك عجلة الاقتصاد، وبيحسن الصورة العامة للاستثمار في مصر.

والأهم، إن الحكومة بتسهل جدا على المستثمرين، وعملت لهم رخصة ذهبية بتطلع في أيام، وكمان في اتفاقيات تجارة حرة مع أكتر من 70 دولة، وأكتر من 1300 فرصة استثمارية جاهزة دلوقتي، وكمان الحكومة  بتستهدف إنها توصلهم ل 3 آلاف فرصة استثمارية قريب جدا.

والخلاصة هي إن استثمار زي ده مش بس رقم بيتقال في مؤتمر، لأ ده خطوة عملية بتأكد إن مصر ماشية في طريق إنها تبقى مركز صناعي وتصديري كبير، واللي جاي أكبر بكتير.