ترامب صعد إجراءاته ضد أوروبا وهدد بفرض رسوم 50% على كل الاتحاد.. إزاي مصر هتستفيد من قرار ترامب وازاي مصر هتتحول لقاعدة للصناعات الأوربية في مصر وسر الخطوة الألمانية الأولي.. 

فاكرين من يومين لما اتكلمنا هنا في بانكير عن قرار الحكومة الألمانية إنشاء منطقة صناعية في المنطقة الاقتصادية لقناه السويس عشان تكون قاعدة صناعية كبيرة للصناعات الألمانية خارج البلاد.. وساعتها حللنا القرار الألماني وقلنا أن ألمانيا عاوزة تستفيد من الموقع الجغرافي المتميز للمنطقة وقربها من خطوط التجارة العالمية وقناة السويس والموانئ والأسواق الهامة في المنطقة والعالم وقلنا بردو إن دول أوروبية تانية هتخطو على خطى ألمانيا عشان تحجز مكان في المنطقة الاقتصادية لقناه السويس واللي بدأت تتحول لقلاع صناعية وعشان تزاحم الصين وروسيا والإمارات والهند وهي الدول اللي أنشأت مدن صناعية بالفعل أو بدأت تنبني مناطق صناعية ودا لأن المنطقة هتغير خريطة الاقتصاد في المنطقة.

طيب إيه الجديد في ملف الاستثمار في المنطقة الاقتصادية لقناه السويس ؟
شوف ياسيدي الرئيس الأمريكي ترامب طلع من ساعات وقال إنه هيوصي بفرض رسوم جمركية بنسبة 50% على الاتحاد الأوروبي تبدأ في الأول من يونيو ودا معناه إنه هيتم فرض رسوم كبيرة على السلع الفاخرة والأدوية وغيرها من البضائع اللي بتنتجها الشركات الأوروبية.. طيب إحنا مالنا بالقرار دا؟.. طبعا الموضوع يهمنا جدا لأن الشركات الأوروبية هتفكر ازاي تهرب من الرسوم المرتفعة اللي فرضها ترامب واللي بتقلص أرباحها ويقلل منافستها في الأسواق الأمريكية الضخمة والخساير بدأت بالفعل ودا بعد تراجع أسهم شركات صناعة السيارات الفاخرة الألمانية وهي من أكتر الشركات تأثرا بالرسوم الجمركية وانخفضت أسهم بورشه ومرسيدس  وبي ام دبليو ودا بعد تصريحات ترامب مباشرة.

وأكيد الشركات الأوروبية هتفكر زي ما فكرت شركة أبل العالمية وهتعمل زيها.. طيب ابل عملت ايه ؟... شوف حضرتك بعد فرض ترامب رسوم جمركية ضخمة على الصين قررت تنقل مصانعها للهند عشان تتجنب دفع الرسوم الجمركية الكبيرة لو استمرت تصنع هواتفها في الصين ومعنى كده إن الشركات الأوروبية هتفكر كده لكن هتفكر في سوق قريب منها وفيه مميزات الاستثمار الآمن والمسافر والاقرب للأسواق الأمريكية وفي نفس مايكونش عليها رسوم جمركية كبيرة وطبعا مصر هتكون الخيار المثالي للشركات الأوربية لتوافر كل المزايا اللي قلنا عليها وأولها إن الرسوم الأمريكية على مصر من اقل الرسوم في العالم وهي 10% ومصر بتحاول تشغيلها خالص وطبعا لو الشركات الأوروبية نقلت مصانعها لمصر فأكيد هتوفر40% من الرسوم عليها ودا هيضمن استمرار أرباحها وضمان منافستها للشركات المنافسة الأمريكية.

يعني باختصار بقية دول الاتحاد الأوروبي هتفكر زي ألمانيا في إقامة مناطق صناعية في مصر لكل الأسباب اللي قلنا عليها وتقدر تتخيل الوضع الاقتصادي ساعتها في مصر وشكل الصناعة هيكون إزاي وحجم الصادرات والعمالة ودا غير الاستثمارات اللي هتيجي من أماكن تانية وغير الضرائب والمرافق اللي هتدفعها المصانع دي للدولة المصرية ودا غير تأثير دا على سعر الدولار في السوق المصري واللي هيتلقى ضربة قوية جديدة هتجيبه الأرض.