الدهب بيطلع كتير وبينزل قليل.. ايه اللي هيحصل في السوق الايام الجاية وليه بنقولك حافظ على الدهب اللي معاك..ولو شايل فلوس زيادة الحق إشتري وخبيه.. تعالى شوف السوق مخبي ايه..
الدنيا لسه مقلوبة في الصاغة المصرية ودا بعد الارتفاعات المتتالية في سعر الدهب رغم فترة التراجع المؤقتة في الأيام اللي فاتت لكن بعد قرار البنك المركزي المصري بخفض الفايدة للمرة التانية على التوالي رجعت أسعار المعدن الأصفر للارتفاع من تاني.. دا في مصر ..
طيب ايه اللي بيحصل في العالم ؟
الوضع العالمي من ساعة عودة ترامب للبيت الأبيض وتولي رئاسة الولايات المتحدة الأمريكية من تاني وفي حالة فوضى في الأسوا العالمية بسبب قراراته العقابية وسياسة الصدمة اللي بيتبعها مع خصومه وكمان حلفاءه التجاريين وكل يوم فيه قرارات جديدة وبدأت بالتهديد ووصلت لفرض رسوم جمركية بنسب مختلفة على كل دول العالم.
وفي الساعات الأخيرة حصل تطور مهم خلي الدهب عالميا يرجع يقفز تاني وهو إعلان البيت الأبيض فرض رسوم 50% على دول الاتحاد الأوروبي ودا معناه توتر جديد في الأسواق العالمية وزي ما احنا عارفين إن أي قلق أو تصعيد في الأسواق الكبيرة بيكون لصالح الدهب واللي أسعاره بتقفز في المصائب زي ما بيقولو وهو المستفيد الوحيد من اي أزمة أو كارثة اقتصادية تحصل ودا لأنه ملاذ آمن كله بيجري عند اي خطر اقتصادي أو أزمة مالية دولية أو قرارات هيكون ليها عواقب وخيمة على الأسواق.
باختصار لو فيه أزمة دولية البنوك المركزية العالمية بتجري تشتري دهب والشركات والافراد بردو بيحولو مدخراتهم والسيولة اللي عندهم لدهب عشان يحفظوا قيمة العملة وعشان التحوط من اي كوارث.. ونقدر نقول إن خفض الفايدة في مصر والتوترات في العالم بره خلت الدهب في حتة تانية.. والأهم بقي أن أسعار الدهب في الفترة الجاية هتزيد حسب التوقعات العالمية واخر توقع بيقول إن الاونصة هتوصل 6 آلاف دولار حضرتك في الشهور الجاية ودا معناه إن أسعار الدهب في مصر هتكون صعبة الفترة الجاية للأسف.
التوقعات الصعبة في سعر الدهب جاية من مؤشرات استمرار التوتر في العالم والخبراء رهنوا بمدة وجود ترامب نفسه في الحكم بالبيت الأبيض ولأن لسه ولايو حكمه في أولها فأكيد التوتر دا هيستمر لفترات طويلة جاية ودا بسبب سياسته التصادمية والقرارات المفاجئة اللي بتربك الاسواق واشتعال خروب اقتصادية مع الصين والاتحاد الأوروبي وغيرها من التكتلات الاقتصادية.
خبراء السوق والصاغة شايفين إن الوقت لسه متاح للاستثمار في الدهب والشراء وتخزينه لأنه استثمار مكسبه مضمون على المدى الطويل وكل ما يقعد كا ما قيمته بتزيد وفي نفس الوقت بيعتبر عامل أمان مالي ومتاح في أي وقت ودي من ميزات الاستثمار في المعدن الأصفر وعشان كمان الطلب على الدهب في مصر مش بيوقف ابدا مهما كان سعره بيرفع في الصاغة ودا بسبب الموروث الشعبي وحفلات الزواج والخطوبة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق