يا ترى إيه حكاية حالة الطوارئ اللي شغالة في البنوك اليومين دول؟، وإيه موضوع لجان الألكو اللي بتجتمع ورا بعض؟، وليه الناس بدأت تتكلم عن خفض أسعار الفايدة على الشهادات والقروض؟

نبدأ الحكاية من الأول كده، وهي من ساعة ما البنك المركزي المصري، قرر في اجتماعه الأخير يوم الخميس 22 مايو، إنه يخفض أسعار الفايدة بنسبة 1%، وده مش أول تخفيض السنة دي، لأ ده كده المجموع بقى 3.25% من أول السنة لحد دلوقتي، يعني الفايدة على الإيداع وصلت لـ24%، وعلى الإقراض لـ25%، وسعر العملية الرئيسية بقى 24.5%.

طيب، إيه اللي حصل بعد القرار ده؟

من ساعتها، البنوك كلها أعلنت حالة طوار، وبدأت حاجة اسمها لجان الألكو في كل بنك تعمل اجتماعات متواصلة، و"لجان الألكو" دي ببساطة هي لجنة الأصول والخصوم، يعني اللجنة اللي بتحدد سعر الفايدة على كل حاجة في البنك، من أول الشهادات لحد القروض والودائع.

طب البنوك بتفكر في إيه دلوقتي؟

بص يا سيدي، كل بنك دلوقتي بيدرس وضعه، هل محتاج سيولة، هل محتاج يجذب عملاء جداد، هل ممكن يطرح شهادات جديدة، هل هيقلل الفايدة على القروض، ولا هيستنى شوية يشوف البنوك التانية هتعمل إيه؟، يعني الصورة ببساطة فيها تفكير في كل حاجة زي شهادات الادخار وحسابات التوفير، وكمان القروض بأنواعها سواء كانت شخصية أو تمويل عقاري أو تمويل سيارات.

طب ليه الموضوع مهم أوي كده؟

لأن القرار ده بيأثر على جيبك بشكل مباشر، لو أنت معاك شهادة أو بتفكر تاخد قرض أو حتى بتدخر في حساب توفير، فأي تغيير في سعر الفايدة هيأثر عليك.

طب إيه اللي قاله البنك الأهلي وبنك مصر؟

البنك الأهلي المصري أعلن إنه عقد اجتماع للجنة الألكو يوم الإثنين 26 مايو، علشان يراجع أسعار الفايدة على الشهادات والمنتجات المصرفية، نفس الكلام أعلن عنه بنك مصر، وقالوا إنهم في طريقهم لعقد اجتماع عاجل علشان يحددوا موقفهم من أسعار الفايدة الجديدة.

طيب.. ممكن يحصل إيه؟

فيه احتمالين كبار، أولهم هو خفض الفايدة على الشهادات، وده معناه إن العائد اللي بتاخده على الشهادة ممكن يقل، وبالتالي لو ناوي تشتري شهادة جديدة، ممكن تلحق قبل التخفيض.

والاحتمال التاني هو خفض الفايدة على القروض، وده هيكون خبر حلو للناس اللي بتفكر تاخد قروض، لأن الفايدة هتكون أقل، بس خد بالك كل بنك هيفكر بطريقته، يعني في بنوك ممكن تقول "أنا مش هقلل الفايدة دلوقتي علشان أحتفظ بالعملاء"،  وفيه بنوك تانية ممكن تطرح شهادة جديدة بسعر منافس لفترة محدودة، وفي بنوك هتركز على تخفيض فوايد القروض علشان تحرك السوق.

يعني باختصار، إحنا في فترة حاسمة، وكل يوم بيعدي ممكن يجيب قرار جديد من بنك معين، فلو أنت مستثمر أو بتفكر في قرض، تابع الأخبار أول بأول، وخد قرارك في الوقت الصح.

وفي النهاية نقدر نقولك إن اللي بيحصل في البنوك دلوقتي هو انعكاس طبيعي لقرارات البنك المركزي، والهدف منه في الآخر إن السوق يتحرك بشكل متوازن، وإن التضخم ينزل، وفي نفس الوقت يبقى فيه دعم للاستثمار والإنتاج، فهيك متابع كويس لأن الأيام الجاية هتكون مليانة أخبار عن الفايدة والشهادات والقروض.