يا ترى إيه اللي بيحصل في المنطقة الاقتصادية لقناة السويس، هل حصل حدث كبير هيقلب موازين المنطقة، وإيه علاقته المواطن البسيط، وإزاي هيساهم في دعم الاقتصاد؟
في الساعات الأخيرة، المنطقة الاقتصادية لقناة السويس، شهدت وضع حجر الأساس لمشروع صيني ضخم على مساحة 200 ألف متر مربع، وتحديدا في منطقة السخنة، وده كان باستثمارات بتوصل ل 200 مليون دولار.
والمشروع ده مش أي مشروع، ده مجمع صناعي متكامل لإنتاج مستلزمات الطاقة الشمسية، هيساهم في توطين الصناعة دي جوه مصر من الألف للياء، واول مرحلة استثماراتها بتوصل ل 90 مليون دولار، وبتشمل إنشاء مصنعين لإنتاج الخلايا الشمسية Cells والوحدات الشمسية Modules بقدرة 2 جيجاوات.
أما بقى تاني مرحلة، فهتكون باستثمارات 110 مليون دولار عشان ننتج المواد الخام زي السيليكون والرقائق، يعني الموضوع متكامل من الآخر، والأجمل بقى إن المشروع هيوفر أكتر من 1800 فرصة عمل مباشرة، وده لسه من غير ما نحسب الفرص غير المباشرة اللي هتكزن فيه.
ومنطقة السخنة دلوقتي بقت محط أنظار المستثمرين، بسبب موقعها المتميز جدا، وكمان هي مجهزة ببنية تحتية على أعلى مستوى وقريبة من الميناء، وكمان الهيئة دايما بتدعم المستثمرين بحوافز كبيرة.
ومن هنا، المستثمرين الصينيين المنفذين للمشروع ده، بيقولوا إن مصر دايما شايفة المستقبل صح، خاصة مع الاتجاه للطاقة المستدامة، وأكد وا كمان إن الصين ومصر شغالين بروح فريق واحد لإنجاح المشروع ده بأسرع وقت وأعلى كفاءة، ومتوقع إن المرحلة الأولى هتشتغل رسميا في النصف الأول من سنة 2026.
وفي النهاية، نقدر نقول إن المشروع ده هيبقى نقلة كبيرة جدا في مجال الطاقة المتجددة في مصر، وخطوة قوية على طريق تحقيق أهداف رؤية 2030، وكمان بيأكد إن مصر جاهزة تكون مركز صناعي إقليمي لصناعة مستلزمات الطاقة الشمسية.
كمان، الصين داخله بتقلها في المنطقة الاقتصادية لقناة السويس، والمشروع ده هيكون بداية لمشروعات كتيرة متعلقة بالطاقة الشمسية، وقريب جدا هنلاقي استثمارات كتيرة داخله في المجال ده، وبالتالي فلوس بتخش البلد واقتصاد بينتعش، وكل ده بينعكس بشكل إيجابي على حياة المواطن البسيط وعلى قوة الاقتصاد وبالتالي استقرار الأسعار في الأسواق.
كل ده كمان، بجانب فرص العمل المباشرة وغير المباشرة اللي هتوفرها المشاريع دي، عشان تأكد إن المنطقة الاقتصادية لقناة السويس بقت بؤرة اقتصادية مهمة جدا في الفترة الأخيرة، ومنها هتنطلق أقوى دفعة للاقتصاد المصري عن طريق الاستثمارات اللي موجودة فيها.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق