هو ايه اللي بيحصل في منجم السكري.. وإيه الحدث المهم اللي هيحصل النهاردة وإزاي بيعتبر قوة اقتصادية كبيرة للدولة المصرية ومصر بتكسب منه كام في السنة.

مصر أول دولة في العالم عرفت الدهب وعرفت طرق استخراجه وتعدينه وتنقيبته وتشكيله كمان والأثار الفرعونية بتوثق دا ولسه فيه مناجم دهب كتير باقية من أيام الفراعنة وعشان كده الدهب مش جديد على أرض مصر وعندها ثروة كبيرة تم اكتشاف جزء منها ولسه الاكتشافات شغالة..

منجم السكرى في مصر أكيد سمعت عنه قبل كده وهو ضمن أكبر 10 مناجم في العالم وأكبر منجم دهب مكشوف في العالم  وبيقع على بعد 30 كيلومتر من جنوب مدينة مرسى علم في قلب الصحراء الشرقية وهو من أكتر أماكن إنتاج الدهب في إفريقيا.

طيب ايه الجديد في منجم السكري؟
شوف ياسيد النهاردة الأحد وزارة البترول والثروة المعدنية هتوقع الاتفاق النهائى مع شركة أنجلو جولد العالمية وهي المستثمر فى منجم السكرى بعد أن تم توقيعه بالأحرف الأولى نهاية  2024 بعد استحواذها على شركة سنتامين المشغلة للمنجم في صفقة وصلت قيمتها لـ 2.5 مليار دولار...

 ودا بعد تنافس شركات عالمية على الاستثمار في المنجم وفي النهاية فازت بيه أنجلو جولد العالمية في خطوة وصفها خبراء التعدين هتحدث نقلة في انتاج المنجم وهتضخ استثمارات ضخمة لتنميته وزيادة الانتاج وتشجيع عمليات الاستكشاف عن المعدن الأصفر وتطبيق تقنيات حديثة فى القطاع المهم جدا ودا ساعد فعلا في جذب شركات عالمية جديدة زي شركة باريك جولد الكندية وهي واحدة من أكبر الشركات الرائدة في مجال تعدين الدهب عالميا واللي أعلنت رغبتها في الحصول على مناطق امتياز جديدة في مصر.

طيب حصة مصر من منجم السكري تطلع كام؟
حسب تصريحات الدكتور مصطفى مدبولي رئيس مجلس الوزراء اتفاق منجم السكري بيضمن حقوق ثابتة لمصر مع إمكانية زيادة حصتها في المستقبل.. وبالأرقام حصة بتوصل لـ 50% من أرباح المنجم مقابل 50% لشركة أنجلو جولد وكمان من حق مصر الحصول على إتاوة بنسبة تصل إلى 3% من صافي إيرادات مبيعات منجم السكري..

ولسه مع الارقام واللي بتقول إن منجم السكري اقترب من  إنتاج  500 ألف أوقية (أونصة) من الدهب سنويا بشكل مستمر في الأمد الطويل ووصل حجم إنتاج المنجم في الفترة من 2009 إلى 2023 لحوالي 5.7 مليون أوقية.

وبلغت المساهمة النقدية لمنجم السكري في 2023 حوالي 121 مليون دولار وبلغ إجمالي نصيب مصر من أرباح وإتاوات منجم السكري حوالي 139 مليون دولار في نفس السنة ومن المتوقع أن يستمر منجم السكري في الإنتاج لغاية 2030 مع احتمال تمديد فترة التشغيل بناء على تقييمات الاحتياطي المتبقية وفي نفس الوقت الخكومة شغالة زي ماقلنا في خطط استكشاف مناجم جديدة وتطوير البنية التحتية وتعزيز مكانة مصر كأحد أهم المنتجين للذهب في العالم.

طبعا دهب السكري جزء كبير منه بيروح لدعم الاحتياطي النقدي من الدهب في البنك المركزي وبكده بيكون عامل أمان مالي استراتيجي ضد تقلبات الأسواق العالمية.. وسنتامين سلمت المركزي نص طن دهب في أخر 6 شهور من 2023 بقيمة وصلت لمليار جنيه.