يا ترى إيه اللي يخلّي دولة زي الصين تقف قدام أمريكا وترامب بكل ثبات؟ و ليه الرسوم الجمركية اللي فرضها ترامب ما هزّتش الاقتصاد الصيني زي ما كان متوقع؟  وإزاي الصين بتواجه الحرب التجارية دي وهي واثقة إنها هتكسب؟

الصين يا جماعة مش مجرد دولة بتصنّع بضايع رخيصة .. لا .. دي قوة اقتصادية عالمية بمعنى الكلمة .. تخيّلوا إن الصين دلوقتي هي ثاني أكبر اقتصاد في العالم .. وفي 2024 كان الناتج المحلي الإجمالي بتاعها حوالي 18.3 تريليون دولار .. يعني لو الاقتصاد الصيني دولة لوحده .. كان هيبقى أقوى من معظم دول العالم.

طب إيه اللي خلا الصين قوية كده في مواجهة قرارات ترامب ؟

أول حاجة لازم نفهمها إن الصين مش بس بتصدّر لأمريكا .. هي دلوقتي بتتاجر مع العالم كله .. يعني لو أمريكا فرضت رسوم 145% على البضائع الصينية زي ما حصل  .. الصين مش هتتخضّ .. ليه؟ .. عشان هي نجحت في السنين الأخيرة إنها تخلّي تجارتها متنوعة .. بدل ما تبقى معتمدة على أمريكا بس .. بقت بتصدّر لدول زي الاتحاد الأوروبي وأستراليا ودول آسيا اللي بتشتري منها بضايع بمليارات الدولارات .. يعني لو أمريكا قفلت الباب .. الصين عندها أبواب تانية كتير مفتوحة.

تاني حاجة .. الصين عندها سوق داخلي ضخم .. تخيّلوا إن عندها 1.4 مليار مواطن .. يعني لو كل واحد اشترى حاجة صغيرة بس .. ده معناه إن السوق الصيني لوحده يقدر يشغّل مصانعها .. الحكومة الصينية عارفة ده كويس .. عشان كده بتشجّع الناس على الإنفاق جوا البلد .. وده بيخلّي الاقتصاد الصيني زي القلعة .. مهما هاجموها من بره .. هي متماسكة من جوا.

تالت حاجة .. الصين مش بس بتصنّع تيشرتات وجزم .. لا .. دي بقت رائدة في التكنولوجيا المتقدمة .. شركات زي هواوي وBYD وغيرها بتتحكم في سلاسل توريد عالمية .. من الطاقة المتجددة زي الألواح الشمسية .. لحد الصواريخ والذكاء الاصطناعي .. يعني الصين دلوقتي مش مجرد مصنع العالم .. هي بقت اللي بتصمّم وبتبتكر .. وده بيديها قوة تفاوضية كبيرة .. لأن العالم كله محتاج التكنولوجيا بتاعتها.

طب وإزاي الرسوم الجمركية بتاعة ترامب مش هامّة الصين؟

ببساطة .. الصين عندها أدوات بتستخدمها زي السحر .. مثلاً .. بتخفّض قيمة اليوان .. اللي هو العملة بتاعتها .. وده بيخلّي البضايع الصينية أرخص للمشترين من بره .. يعني حتى لو أمريكا زوّدت الجمارك .. الصين بتقدر تعوّض بالأسعار التنافسية .. كمان الصين بترد بقوة .. زي لما فرضت رسوم 84% على البضايع الأمريكية في أبريل 2025 .. وده خلّى أمريكا هي كمان تتضرر .. يعني الحرب التجارية دي مش لعبة من طرف واحد.

كمان الصين بتلعب على الدبلوماسية .. بكين مش بس بتتكلم مع أمريكا .. هي بتبني علاقات قوية مع دول تانية .. زي دول أفريقيا وأمريكا اللاتينية .. وده بيخلّيها أقل اعتماداً على السوق الأمريكي .. وفي نفس الوقت بتضغط على أمريكا عشان تراجع حساباتها .. لأن لو أمريكا زوّدت الرسوم كتير .. الأسعار في أمريكا نفسها هتزيد .. والمواطن الأمريكي هو اللي هيدفع التمن.

وتقدر تقول كده ان الصين زي الملاكم اللي بيعرف يستحمل الضربات ويرد بذكاء .. اقتصادها قوي عشان متنوع .. سوقها الداخلي عملاق .. وتكنولوجيتها متقدمة .. رسوم ترامب ممكن تزعجها شوية .. بس مش هتوقّفها .. عشان الصين بتفكر بعيد .. وبتراهن على إنها هتفضل واقفة مهما حصل.