يا ترى إيه اللي بيحصل دلوقتي في واشنطن؟ وحسن عبدالله محافظ البنك المركزي المصري بيعمل إيه هناك؟  وإزاي مصر بتعزز مكانتها مع أكبر مؤسسات التمويل الدولية .. وإيه اللي بيخلي صندوق النقد والبنك الدولي يبصوا لمصر بنظرة إيجابية ؟

فى الايام اللى فاتت العاصمة الأمريكية واشنطن بتستضيف الحدث الاقتصادي الأهم في العالم.. اجتماعات الربيع لمجلس محافظي صندوق النقد الدولي والبنك الدولي.. كبار المسؤولين من كل حتة في العالم بيتلموا عشان يناقشوا مستقبل الاقتصاد العالمي.. وبيمثل مصر فى الاجتماعات دي  حسن عبدالله محافظ البنك المركزي.

حسن عبدالله مش بس بيحضر اجتماعات ويتصور .. ده بيشتغل على تقوية مكانة مصر الاقتصادية عالميًا .. خلال الأيام دي .. شارك في اجتماع وزراء المالية ومحافظي البنوك المركزية لمجموعة العشرين.. الاجتماع ده على هامش اجتماعات الربيع .. وناقش مواضيع كبيرة زي استقرار الاقتصاد العالمي في ظل الأزمات زي الحروب وارتفاع أسعار الطاقة .. حسن عبدالله طالب بزيادة دعم الدول النامية من خلال تمويل مبتكر وشراكات جديدة بين القطاع العام والخاص .. وده بيخدم مصر وإفريقيا بشكل مباشر.

مش بس كده .. حسن عبدالله كان ليه لقاء مهم جدًا مع نايجل كلارك نائب المدير العام لصندوق النقد الدولي .. واتكلموا عن برنامج الإصلاح الاقتصادي اللي مصر بتطبقه مع الصندوق .. اللقاء ده حضره وفد مصري قوي ضم رانيا المشاط وزيرة التخطيط والتعاون الدولي .. وأحمد كجوك وزير المالية .. و محمد معيط ممثل المجموعة العربية في الصندوق .. وكمان رامي أبو النجا نائب محافظ البنك المركزي .. والسفير معتز زهران سفير مصر في أمريكا ..ة اللقاء كان نقطة تحول في علاقة مصر مع الصندوق.

طب إيه تأثير الاجتماعات دي على مصر؟
اللقاءات دي مش مجرد كلام.. دي خطوات بتخلي مصر لاعب أساسي في الساحة الاقتصادية العالمية .. نايجل كلارك أشاد بالإصلاحات الاقتصادية في مصر .. وقال إن مصر بتتعامل بذكاء مع التحديات الاقتصادية العالمية زي التضخم وأزمات الطاقة .. الإشادة دي معناها إن صندوق النقد والبنك الدولي بيبصوا لمصر كشريك موثوق .. وده بيفتح أبواب لتمويل جديد بفوايد ميسرة .. وبيزود ثقة المستثمرين الأجانب في السوق المصري.

مصر كمان بتشارك في مجموعة العشرين للمرة الخامسة .. والتالتة على التوالي .. وده بيثبت إنها مش مجرد ضيف شرف .. إحنا بنقدم أفكار وبتناقش قضايا زي تمويل التنمية ومواجهة تغير المناخ .. وحسن عبدالله بيحط مصالح الدول النامية على الطاولة .. وده بيخلي صوت مصر مسموع في كل حتة.

وده معناه إيه للاقتصاد المصري؟
الاجتماعات دي بتترجم لنتايج ملموسة.. الإصلاحات اللي مصر بتعملها مع صندوق النقد بتساعد على استقرار الاقتصاد.. زي زيادة احتياطي النقد الأجنبي وتقليل التضخم.. كمان العلاقة القوية مع المؤسسات الدولية بتساعد على جذب استثمارات أجنبية.. وبتخلّي مصر وجهة مثالية للمشروعات الكبرى زي البنية التحتية والطاقة النظيفة.. وده كله بيخدم هدف واحداقتصاد قوي ومستدام.

المؤكد ان حسن عبدالله في واشنطن بيبني جسور مع أكبر مؤسسات التمويل في العالم .. من لقاءاته مع صندوق النقد لنقاشاته في مجموعة العشرين.. كل خطوة بتقرب مصر من مكانة اقتصادية أقوى.. والإشادات الدولية بتثبت إن مصر ماشية صح.