إيه التطورات الجديدة والمفاجئة في سوق السيارات المصري.. وياتري هنشوف تخفيضات جديدة وكبيرة في السوق الايام الجاية ولا الأسعار هتروح على فين.. ولو بتفكر تشتري عربية دلوقتي تستني ولا تشتري.
سوق السيارات بيعيش بداية انتعاشة قوية وتوقعات بانخفاض ملحوظ في أسعار السيارات ودا اللي قاله خبراء السوق وفسروا توقعاتهم لاكتر من سبب أولها بدء طرح شركات السيارات في مصر موديلات سنة 2026 رسميا ودا هيسبب انخفاض طبيعي في أسعار موديلات 2025 لأن الشركات هتلجأ للتخلص من المخزون اللي عندها واللي أتأثر بشكل كبير بحركة الركود العام في السوق مع ارتفاع الأسعار في الفترة اللي فاتت وعشان كده كتير من الشركات قدمت عروض لتصريف المخزون خصوصا من طرازات 2025 فى محاولة لتنشيط حركة البيع والشراء.
ومع استمرار تدفق موديلات 2026 متوقع طبعا نشوف مزيد من التخفيضات في أسعار الموديلات الاقدم بجانب انخفاض ملحوظ في أسعار السيارات المستعمله بالتوازي مع زيادة المعروض من الزيرو وانتعاش حركة البيع..
فيه اكتر من سبب تاني لتوقعات انخفاض أسعار السيارات منها انخفاض أسعار الدولار في الفترة الأخيرة بجانب استقرار سوق الصرف بشكل عام على مدار فترة كبيرة ودا خلق حالة من الاستقرار في استيراد قطع الغيار واللي انخفضت اسعارها الفترة اللي فاتت ودا بيكون ليه تأثير مباشر على انخفاض أسعار السيارات.. ومثلا اخر التقارير بتقول إن سوق إطارات السيارات في مصر شهدت موجة جديدة من التراجع في الأسعار خلال شهر أبريل الجاري وبمعدل يتراوح بين 10% و15% مقارنة بالأسعار خلال الربع الأول من 2025 واي انخفاض في أي مكون من مكونات صناعة السيارات بيكون ليه تأثير في السعر النهائي للسيارة.
كمان من بين الأسباب لخفض أسعار السيارات الفترة الحالية واللي جاية هو الانفراجة الكبيرة في مبادرة استيراد سيارات المصريين بالخارج ودا بعد إعلان وزارة المالية عن استئناف خدمات الدعم الفني عبر التطبيق الإلكتروني لمبادرة تيسير استيراد ودا بعد الانتهاء من تنفيذ مجموعة من التحديثات الفنية واللي كانت سبب في تعطل السيستم ودا لتسهيل إجراءات استيراد السيارات لأبناء مصر بالخارج وتعزيز استفادتهم من التسهيلات المقررة وقالت وزارة المالية إن المواطنين المستفيدين من المبادرة يقدروا دلوقتي يتابعوا طلباتهم وتنفيذ إجراءات الشحن عبر التطبيق الإلكتروني بكل سهولة ويسر.... طبعا الخبر دا مهم جدا لأن معناه استئناف عمليات الاستيراد من الخارج للموديلات الزيرو ودا معناه بردو حضرتك زيادة إضافية في معروض السيارات بالسوق ودا هيخفض الاسعار من تاني حسب قانون العرض والطلب ودا بخلاف أن مبادرة استيراد سيارات المصريين بالخارج من أهم المبادرات خارج الصندوق لتوفير النقد الأجنبي للدولة المصرية.
كل الأسباب اللي قلنا عليها دي هتاثر بالتخفيض في أسعار السيارات الفترة الجاية سواء زيرو أو مستعمل وعشان نكون واضحين اي كلام عن أسعار السيارات لازم نعرف أن الدولار هو المحرك الرئيسي لأنه قطاع بيعتمد بشكل كبير على الاستيراد والسوق مش هتتحرر من الوضع دا وتخلص من رحمة الدولار غير لما الإنتاج المحلي من السيارات يدخل الأسواق المحلية بشكل كبير ودي الحالة الوحيدة اللي هيكون ليها تأثير قوي على أسعار السيارات وهيحصل انفراجة كبيرة في الأسعار لأن المنتج المحلي هيكون ارخص بكتير من المستورد وفي نفس الوقت هنشوف عروض وتخفيضات كتيرة الفترة الجاية مع بدء تدفق الإنتاج المحلي من السيارات.
طيب مؤشرات السوق بتقول ايه دلوقتي ؟
رئيس شعبة وكلاء وموزعي وتجار السيارات بالغرفة التجارية بالقاهرة، نور الدين درويش قال إن فيه حالة تراجع الطلب على شراء السيارات دلوقتي ودا مع النمو النسبي للمعروض من بداية العام الحالي ودا انعكس على الأسعار حاليا ودفعها للانخفاض يعني حدة الطلب قلت ودا سبب اضافي لانخفاض الاسعار.. ولفت كمان درويش لحاجة مهمة جدا وهي استئناف الوكلاء عمليات فتح اعتمادات مستندية بالبنوك وتنفيذ عمليات استيراد جديدة خلال الشهور الأخيرة ودا عزز من المعروض وأنهى ظاهرة الأوفر برايس وبالتالي شهدت الأسعار تراجعا على مختلف الفئات من السيارات بمعدلات متقاربة..
الخبير نصح المواطنين إن الوقت الحالي مناسب جدا للشراء بسبب التخفيضات وقال إن سعر الدولار هو الفيصل في أسعار الشهور الجاية ودخول الإنتاج المحلي لكن بشكل عام هنشوف استقرار وتخفيضات جديدة في الفترات الجاية مع حالة الاستقرار العام في سوق السيارات.. يعني تقدر حضرتك تشتري سيارتك دلوقتي وانت مطمئن.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق