يا ترى ايه حكاية الصفقة السرية اللي أنهت مع ترامب مع الصين ؟ وايه علاقة صندوق النقد بالهدنة اللى تم التوصل ليها بين واشنطن وبكين؟ وهل الهدنة دي ممكن تستمر ولا تنهار فى اى وقت ؟ وايه اللى هيحصل لأسواق العالم لو الهدنمة انهارت؟
خلّونا نبدأ من الأول .. من كام اسبوع.. وزير الخزانة الأمريكي سكوت بيسنت والمسؤول الصيني لان فوأن قعدوا مع بعض في قبو مقر صندوق النقد الدولي بواشنطن .. بعيد عن عيون الكاميرات وعدسات الجرايد .. المكان كان زي أفلام الجاسوسية بظبط .. مفيش حد عرف بالاجتماع ده غير لما صحيفة فاينانشال تايمز كشفت اللعبة .. المفاوضات دي كانت عشان يلاقوا حل للحرب التجارية اللي قلبت الأسواق كلها .. وفعلاً بعد نقاشات طويلة وماراثونية .. وصل الطرفين لاتفاق في مفاوضات جنيف.
إيه بقى الاتفاق؟
أمريكا خفّضت الرسوم الجمركية على البضايع الصينية من 145% لـ30% .. والصين ردت بخفض رسومها من 125% لـ10% .. والهدنة دي مدّتها 90 يوم بس .. يعني حاجة مؤقتة.
طب مين اللي كسب في الصفقة دي؟
ده السؤال اللي الكل عايز يعرف إجابته .. ترامب طلع قال إنه أخد "انتصار كامل" .. في الوقت اللي وسايل إعلام صينية قالت إن بكين هي اللي طلعت منتصرة .. وحتى على السوشيال ميديا في الصين .. ناس كتير قالت إن أمريكا هي اللي تراجعت ..لكن أغلب الخبراء شايفين أمريكا هي اللي بدأت الحرب الأول .. يعني زادت الرسوم أكتر من اللازم لحد ما حسّت إنها هتتضرر لو كملت .. عشان كده اضطرت تخفّض.
لكن خلّونا نبص على الصورة بشكل أشمل.. الهدنة دي خفّفت الضغط شوية على الأسواق .. الأسهم ارتفعت .. والمستثمرين أخدوا نفس .. بس الخبراء بيقولوا إن الموضوع مش مضمون .. الرسوم الأمريكية لسه عالية بـ40% على البضايع الصينية .. والصين لسه بتحطّ 25% .. ده غير إن قطاعات زي العربيات الكهربائية لسه تحت ضغط رسوم زيادة من أيام إدارة بايدن .. يعني الاستقرار ده ممكن يكون زي الراحة اللي بتيجي قبل العاصفة.
طب لو الهدنة دي انهارت .. إيه اللي هيحصل؟
الأسواق هتدخل في دوامة تقلبات .. مؤشرات زي داو جونز وناسداك ممكن تهبط زي ما حصل في أبريل 2025 لما ترامب أعلن رسوم جديدة .. وقتها داو جونز نزل 9.5% وناسداك خسر 11.5% في يوم واحد .. لو الاتفاق اتفشكل .. أسعار السلع زي الإلكترونيات والعربيات هتزيد .. وده هيأثر على التضخم في كل حتة .. من مصر لأوروبا .. والمستثمرين هيبدأوا يخافوا تاني .. ومؤشر الخوف VIX هيرتفع .. يعني توقعوا حالة من التوتر في البورصات العالمية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق