ايه اللي هيحصل يوم 22 مايو الجاي وايه علاقته بسعر الدهب.. وليه بنقولك ماتبيعش قبل ما تشوف القرارات اللي هتطلع في اليوم دا.. وياترى سوق الدهب رايح على فين بعد التاريخ دا..
الدهب طالع نازل في الفترة الأخيرة ورغم وصوله لمستويات قياسية في الفترات اللي فاتت لكن بحكم السوق بتعتبر زيادات طبيعية ولسه ممكن يزيد تاني في أي وقت.
طيب ليه الدهب بيجي عليه اوقات يرتفع بأرقام فلكية ؟
قلنا لحضراتكم قبل كده إن الدهب معدن حساس جدا لاي أزمات مالية أو اقتصادية أو توترات سياسية وحتي بيتأثر كمان بالعوامل والكوارث الطبيعية وسعره بيزيد في الأحداث دي ودا لأن الدهب بيعتبر ملاذ آمن ضد التقلبات والمخاطر الاقتصادية المحتملة وعشان الطلب عليه بيزيد جدا من البنوك المركزية والشركات السعر بيرفع دايما وقتها ودا اللي شفناه في الشهور اللي فاتت بعد الأزمة الروسية الأوكرانية والعقوبات الاقتصادية علي موسكو .. وسعر الدهب زاد كمان بعد إندلاع الصراع في الشرق الأوسط.. ووصل لارقام قياسية بعد قرارات ترامب الأخيرة بفرض رسوم جمركية على كل دول العالم.
طبعا كان طبيعي جدا الصاغة المصرية تتماشي مع تطورات سوق الدهب العالمي والاسعار تقفز لمستويات تاريخية وشفنا دا فعلا والاسعار وصلت لارقام تاريخية في الصاغة المصرية.. وبعدها بدأت الأمور تستقر بالتدريج بعد الاتفاق الصيني الأمريكي على الرسوم الجمركية وقرب التوصل لحلول للازمات الدولية التانية..
طيب يعني الدهب هينزل الفترة الجاية ؟
نقدر نقول مفيش حاجه مضمونة لأن الأزمات ممكن تتجدد في أي لحظة وفي اي منطقه في العالم وعشان كده الدهب دائما عليه الطلب والدول بتتحوط بيه من الأزمات أو التوترات اللي حتي ممكن تحصل في المستقبل.. يعني كل دولة بتعمل حسابه وتزود احتياطي الدهب عندها لأن العالم بقي على صفيح ساخن وعشان تتحوط ضد تقلبات العملات دوليا.
طيب ايه اللي هيحصل في يوم 22 مايو اللي جاي ؟
في التاريخ دا لجنة السياسة النقدية في البنك المركزي المصري هتجتمع لبحث مصير سعر الفائدة ودا بعد خفضها في الاجتماع اللي قبله بشكل ملحوظ.. ولو بتسأل ايه علاقة سعر الفايدة بالدهب .. هنقول لحضرتك أن فيه علاقة مباشرة بينهم لأن لو المركزي قرر يخفض الفايدة في اجتماعه اللي جاي مثلا يبقي الطلب على الدهب هيزيد بشكل ملحوظ وسعره هيرفع لأن خفض الفايدة بيشجع أصحاب المدخرات والسيولة على الاستثمار في المعدن الأصفر لانه أكثر جدوى وربحية..
اغلب خبراء الاقتصاد شايفين أن المركزي ممكن يثبت سعر الفايدة بسبب أرقام التضخم اللي زادت بعد ارتفاع أسعار الوقود وفيه رأي شايف إنه ممكن يخفض بشكل بسيط ولغاية ما يطلع قرار المركزي لو معاك دهب استني لغاية ما تشوف القرار هيقول ايه.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق