يا ترى إيه اللي بيحصل في الأسواق الأمريكية دلوقتي بعد الهدنة التجارية بين أمريكا والصين، هل الشركات بدأت تنتفس من جديد وتفكر في إعادة تعويض الخسائر، وحالة الأسواق والذهب ومناخ الاستثمار رايحة على فين، وهل الأسواق المحلية في دول تانية اتأثرت بالقرار ده ولا لأ؟

من ساعات مش كتيرة، أمريكا والصين اتفقوا على وضع حد للحرب التجارية، وبالفعل اتفقوا على خفض الرسوم الجمركية على منتجات من الدولتين مؤقتا، عشان التوترات التجارية تهدة شوية واقتصاد البلدين يعوضوا الخساير اللي حصلت لهم في فترة الخصومة.

ومن هنا، أمريكا قررت تخفض التعريفات على السلع الصينية من 145% إلى 30% لمدة 90 يوم، وفي نفس الفترة الصين هتقلل الرسوم على السلع الأمريكية من 125% إلى 10%.

وطبعًا، القرار ده كان له تأثير سريع على الأسواق، وساهم في إن الأسواق العالمية ترجع تتنفس تاني، لأن ده بيعتبر مقدمة لفرصة تعزيز الاستقرار الاقتصادي في الأسواق العالمية والمحلية.

ومن أهم مكاسب التهدئة اللي حصلت هو تراجع أسعار الدهب العالمية، بنسبة 2.5% عشان توصل الأوقية لـ 239.54 دولار، كمان هبطت العقود الآجلة الأمريكية بنسبة 3% مسجلة 3،244.20 دولار، وده حصل بسبب التهدئة بعد ما كان الدهب سجل أعلى مستوى تاريخي له.

كمان، قرار التهدئة الأمريكي الصيني جه في توقيت مهم جدًا، لأن العالم كله بيشهد ارتفاع متزايد في تكاليف الاستيراد ونقص في بعض المواد الغذائية بسبب اضطرابات سلاسل الإمداد العالمية، لكن الاتفاق ده بقى عبارة عن رسالة طمأنة للتجار والمستهلكين، وهيدي فرصة كويسة  لإعادة ضبط السوق وتوفير بيئة أكثر استقرارًا للأسعار.

عندك بردو، خفض التعريفات بين أكبر اقتصادين في العالم هيأثر بشكل غير مباشر على الأسعار العالمية للمواد الخام والسلع الأساسية، وده هينعكس بشكل إيجابي على السوق المصري من خلال تراجع نسبي في تكاليف الاستيراد وتوفر السلع بشكل أفضل، عشان يساهم في تحسين القوة الشرائية للمواطن وتخفيف الضغط على الفئات المتوسطة ومحدودة الدخل.

ولكن رغم التفاؤل، إلا أنك لازم تعرف إن الهدنة دي مؤقتة، وفي قضايا تجارية عالقة بين أمريكا والصين ممكن جدًا تفجر الأزمة من جديد، عشان كده مهم جدًا على دول كتير إنها تستعد كويس لأي أزمة جاية، وتخلي عندها مخزون استراتيجي من السلع الأساسية، وكمان توسع قاعدة التصنيع المحلي عشان تقلل الاعتماد على الواردات الأجنبية، ومش بس كده لأ ده كمان لازم كل شخص يكون مستعد لمواجهة أي تحديات جاية بسرعة وذكاء.