آخر كلام البنت لعيون الولد.. كلمه
رد الولد... كنتى الأميره.. الأَميره
وانا كنت أجبن جبان.
يا صُبح: لو بلّ الطَّريق منَّكْ نَدَى
وِحْياةْ عُيُون القاهرة...
ما تْبِلّهَاش
ضيَّعْت فيك عمر ابتدا واشتقت لك
عمرين بلاش
فانشقَّ شَقّ القلب شَقّ الغيم على قلبين
جُمَالْ كلّ القلوب اتجمَّعو
بيزفّوا كل المحرومين يا صُبح...
مِينْ يعرف حبيبى ماحبّهوش ؟!
وحياة عينيك يا صبح رد بآه...
يا لأ حَبِّيتْ حبيبى ؟
لفحتنى نسمهْ بارده جدًّا...
فانتبهت وقعدت افكَّرْ
فين حبيبى وْ فين انا ؟؟!!
يا كل مِنْ يعرف مكانه يبلَّغُهْ
الليله دبت من القلق ومن اختصار الكلمه
فى الوقت المناسب ومن الصداع
ومن ابتهاج القلب فرحان باللقا
ومن الوداع معقوله بَسّ
ازَّاى احبِّكْ... وانتى أبعد م الخيال؟
حَتَّى الخيال بيكون ساعات أقرب كتير
والحبّ أسهل للِّى زَيِّى
لو بتتحدَّاه عِينِيكِى
أنَا كنت مِنّك زى ضِلّ بنسحب..
قُدَّام عينيكى وانتى رافضه تْحِسِّى بِيهْ
أنا كنت إيه غير طفل ماشى فْ سكَّه تايْهَهْ
رافضه تتعَكِّزْ عَلِيهْ ؟
تتصوَّري.. الطير بكى لحظة ما حسّ بقربه مِنِّكْ
لحظِةْ ما كان لازم يضُمِّكْ
يا دقَّة القلب اللى حاولت تكسر القيد
اللى كنا نشتهيه.
مش كنتى شوقه اللى فاضل له
واللى ابتدا يغرق فى ضله
كنتى حلم كبير عَلِيهْ
كنت حلْم كبير عَلِيهْ.
*منصور البغدادي.. من شعراء العامية المميزين والذى ضمهم معجم أدباء مصر الصادر عن الهيئة العامة لقصور الثقافة. حصل على العديد من الجوائز منها أول جمهورية فى شعر العامية ٢٠٠١ و٢٠٠٣ و٢٠٠٥.. له ثلاث دواوين مطبوعة وهى: آخر بنات الحكاية، تمرحنة، وأستاذ.. وتلميذة.
0 تعليق