وأخيرا باعرف أطير
واتنطط زى العصافير
من فرع لفرع
واتشقلب فى الجو
واخيرا بقى ليّه جناح
اعرف ارفرف
وافردهم ع الدنيا
واطلع للسما
واشوف الكون من فوق
واعمل كل اللى فى بالي
وانزل ع الفاضي
اغزل من نور الشمس بيوت
واصنع لوحات
وعشش م القش
مش عاوز اموت
باعرف ازقزق
باعرف اغنى
واعمل الحان
ولا احسن عازف مزيكا
دلوقتى انا ممكن أطير مسافات
واتنقل على عواميد النور
واجى لِك قدام شباكك
والف وادور حواليكى
وازقزق لِك
واحكى لِك كل اللى فى قلبى
واقول لِك تانى اغانى غزل
لو جيت لِك؟
هترُدى عليّه؟!.
■ حسام العقدة.. شاعر عامية عضو إتحاد كتاب مصر، كتب أشعار عدة مسرحيات وبرامج تلفزيونية، ومثل مصر فى الملتقى العربى للشعر الملحون ببنزرت فى تونس ٢٠٢٥.. صدر له عدة دواوين، منها: "القطه العميا"، "نقوش فرعونية"، "الجهنميّه"، "المراجعة النهائية فى مادة العشق"، و"رسايل مسروقه من واتساب سيدة أربعينية"
0 تعليق