تعرف إن إيميل واحد ممكن يكلف شركتك ملايين؟ طب تعرف إن النصابين والمحتالين بيخترقوا إيميلات زي بتاعك في ثواني؟ طب تفتكر شركتك محمية من مافيا النصب الدولية اللي بتسرق بالإيميلات ولا ممكن تكون عرضة للسطو على فلوسك؟
في عصر الديجيتال اللي إحنا فيه.. مافيا النصب الدولية بقت أذكى من الأول.. بيستخدموا الإيميل عشان يخترقوا شركات ويسرقوا فلوس بالملايين فلو عايز تحمي شركتك لازم تعرف إزاي الناس دي بتشتغل وإزاي تقفل عليهم كل الثغرات.
النصابين دول مش مجرد هاكرز بيحاولوا يخترقوا جهازك.. دول مافيا منظمة بتستهدف شركات زي شركتك خصوصًا لو بتتعامل في تجارة دولية.
طب إزاي بيعملوا كده؟
بيدخلوا على بريدك الإلكتروني أو بريد المورد بتاعك وبيبقوا عارفين كل حاجة عن الصفقة بتاعتك من المراسلات بيعملوا إيميل شبه إيميل المورد بتاعك بالظبط. عني لو إيميل المورد بتاعك بيعملوا واحد زيه بالظبط بس بحرف مختلف عشان ما تاخدش بالك.
بيبعتولك إيميل كأنه من المورد بيطلبوا منك تحول الفلوس على حساب بنكي جديد.. الإيميل بيبقى فيه فواتير ومستندات شكلها حقيقي بس كله مزيف.. و لما شخص بيصدقهم ويحول الفلوس بتروح لحساباتهم وبيوزعوها على حسابات تانية في ثواني. يعني لو اتأخرت يوم واحد، الفلوس دي بتختفي.
السؤال هنا لو إيميل زي ده وصلك دلوقتي، هتعرف تكتشفه؟
النصابين أذكياء بس إنت ممكن تكون أذكى. فيه خطوات بسيطة لو عملتها، هتقفل عليهم الباب.. وي ان أي إيميل فيه طلب تحويل فلوس أو تغيير حساب بنكي، لازم تتصل بالمورد على تليفون أو قناة تواصل تانية موثوقة.. ما تعتمدش على الإيميل لوحده.
فعّل المصادقة الثنائية على كل إيميلات الشركة. .يعني لو حد عرف الباسورد.. ما يقدرش يدخل من غير كود بيجيلك على تليفونك.
علم موظفينك يبصوا على علامات النصب.. زي إيميلات فيها أخطاء إملائية.. أو طلبات تحويل مفاجئة، أو إيميلات من نطاقات غريبة.. وركّب برامج أمنية حديثة على أجهزتك وخليها تتظبط كل فترة.. برامج زي دي بتحذرك لو فيه حاجة مش طبيعية.. ولو فيه أي تغيير في بيانات الحسابات البنكية، اتأكد منه بنفسك. اتصل بالمورد أو ابعتله واتساب على رقم موثوق.
طب لو حصل واتسرقت.. إيه العمل؟
لو حصل واتنصب عليك.. الوقت هنا هو كلمة السر. كل دقيقة بتفرق.. كلم البنك بتاعك في نفس اللحظة.. لو أبلغت بسرعة.. ممكن يقدروا يوقفوا التحويل أو يتتبعوه.. وخد بالك استرداد الفلوس بيعتمد على إزاي البنك بتاعك بيتصرف.. فيه بنوك عندها فرق متخصصة بتتبع الفلوس دول، بس لو النصابين قسموا الفلوس على حسابات كتير المهمة بتبقى صعبة.
قدم بلاغ للشرطة أو الجهات المختصة في بلدك.. لو الصفقة دولية، ممكن تحتاج محامي متخصص في الجرائم الإلكترونية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
0 تعليق