العالم بيقول ايه عن نهضة مصر في مجال الطاقة الكهربائية وأزاي مصر اتحولت لوحش كبير في مجال الطاقة .. والسفارة الأمريكية والمحطة الفضائية الدولية قالت إيه على زيادة قدرات مصر من الكهرباء.. ومصر صرفت كام على بند الطاقة خلال 10 سنين.

قطاع الكهرباء في مصر شهد في حكم الرئيس السيسي نهضة غير مسبوقة وكلنا فاكرين الكهربا كانت عاملة ازاي ايام حكم الإخوان الكبيس وازاي كانت بتقطع ب14 ساعة في اليوم الواحد ودا بسبب فشلهم في تنمية القطاع دا وهو الفشل اللي امتد لكل مرافق الدولة وخلي الاستثمارات تهرب وصعبت الحياة على المصريين.

مع قدوم الرئيس السيسي حصلت طفرة قياسية في كل القطاعات والبنية الأساسية وبخاصة قطاع الكهرباء والطاقة بشكل عام ومصر بقي عندها فائض كبير ومشروعات ربط كهربائي مع الدول العربية أوروبا وأفريقيا وبتستعد للتصدير وشفنا إزاي محطات سيمنز الألمانية العملاقة ركبت واشتغلت في مصر بوقت قياسي وكان حديث العالم ومع المشروعات الكهربائية العملاقة في مصر الدولة أسست لأهم قطاع لجذب الاستثمارات والمشروعات الأجنبية والعربية لمصر لأن من غير كهربا مفيش مستثمر هيجي البلد.

طيب ايه الجديد في ملف الطاقة ؟

من ساعات السفارة الأميركية بالقاهرة نشرت صور لمصر من محطة الفضاء الدولية وكتبت على صفحتها الرسمية إن مصر فعلا منورة بأهلها وقالت كمان إن  الصور لا تقتصر على إظهار أنوار القاهرة ليلا لكن في نفس الوقت بتوضح نمو المدينة وتطورها وازاي القاهرة بتكبر وتتوسع مع مناطق جديدة زي القاهرة الجديدة و6 أكتوبر وقالت إن الصور بتمثل أدوات علمية بتساعد العلماء في رصد توسع المدن وحجم استهلاكها للطاقة، وكيفية تحسن البنية التحتية وختمت تعليقها على النهضة الكبيرة في قطاع الطاقة بمصر وقالت لما نبص من الفضاء بنكتشف إن المسافات بتصغر وفرصنا للتعاون بتكبر خصوصًا لما بلدينا يشتغلوا سوا لتطورنا كلنا.

طبعا النهضة المصرية في قطاع الكهرباء مش محتاج شهادات دولية لأن كل الأرقام والمشروعات معلومة للجميع لكن في نفس الوقت بتكشف إن العالم كله بيتابع التطور الكبير في مصر وبنيتها التحتية القوية.. واو رجعنا للارقام هنلاقي ان استثمارات الحكومة المصرية في قطاع الكهرباء في عهد الرئيس السيسي تجاوزت نص تريليون جنيه مصري (17 مليار دولار أميركي) خلال الـ10 سنين الأخيرة وتم إنفاق ما يقرب من نصفها في الفترة بين أعوام 2016 و 2018.

وكشف تقرير صادر عن وزارة الكهرباء والطاقة المتجددة عن حجم الاستثمارات التي تم تنفيذها منذ عام 2014 ولغاية عام 2024 لتحسين ورفع كفاءة جودة الخدمة المقدمة للجمهور وقالت إن إجمالي الاستثمارات المخصصة لرفع كفاءة شبكات التوزيع بس خلال الفترة من 2014 إلى 2024 بلغ حوالي 60.6 مليار جنيه.

كمان قطاع الطاقة الكهربائية في مصر اتحول من مجرد بنية أساسية لجذب المشروعات وتوفير الطاقة للمواطنين على مدار الساعة لكن امتد ليكون قطاع جاذب للاستثمارات العالمية ودلوقتي فيه مشروعات ضخمة بتحصل في قطاع الطاقة وخاصة الطاقة النظيفة من الرياح والشمس وفيه مشروعات إماراتية وخليجية بمليارات الدولارات في المجال دا واللي ليشهد إنطلاقة جديدة بتستهدف التصدير للخارج وتحول مصر لمركز عالمي للطاقة.