مصر ناوية تنقل السياحة لحتة تانية.. وفي جهود كتيرة بتصل لزيادة اعداد السائحين اللي جايين مصر.. والمرة دي من دول الخليج.. ياتري اية اللي بتعمله الحكومة علشان تزود أعداد السائحين.. واية مستهدفات الحكومة من قطاع السياحة.

السياحة واحدة من الأبواب الرئيسية لمصادر الدخل الدولاري لمصر من الخارج، لكن للاسف وبسبب التوترات الجيوسياسية الأرقام اللي كانت الدولة بتستهدف تحقيقها انخفضت بسبب حالة القلق اللي موجودة عند اغلب السائحين من النزول لمنطقة الشرق الأوسط، والدولة بتحاول تعالج النقطة دي من خلال الرسائل اللي الحكومة بتبثها بشكل مباشر وغير مباشر للترويج لعاملي الأمن والأمان اللي بتنعم بيهم مصر.

واحدة من الرسائل المهمة اللي وجتها الحكومة للسائحين حوالين العالم كانت من الرئيس عبدالفتاح السيسي للتأكيد علي توافر الأمن والأمان في الشارع المصري، لما اصطحب الرئيس الفرنسي إيمانويل ماكرون في جولة سياحية بشارع المعز ومصر القديمة وقعدوا علي قهوة ونزلوا ومشيوا وسط الناس في مشهد استحاله نشوفه في اي دولة أوروبية لما رئيس دولة من أكبر واعظم الدول الأوروبية ينزل الشارع ويمشي في وسط الناس وفي دول اجنبية بالنسبة له، ده اللي ظهر في تعبيرات وش الرئيس الفرنسي واللي كان منبهر بالمشاهد والحب اللي شافه في مصر والالفه اللي موجودة بين الناس والأمن والأمان اللي بيعيش فيهم المواطن المصري.

طيب اية اللي بتعمله الحكومة علشان تزود عدد السائحين العرب في مصر؟.

حاليا وزارة السياحة والأثار بتشارك في معرض مهم جدا وبيعد من أهم المعارض السياحية الدولية وهو سوق السفر العربي، واللي الدولة بتشارك فيه بوفد حكومي بالاضافة لعدد من شركات القطاع الخاص، واللي هدفه الترويج للسياحة المصرية وتعريف السائحين العرب عن المنتجات السياحية الموجودة في مصر، خصوصا أن السائح العربي لع مكانة خاصة بالنسبة للسياحة المصرية وده بسبب أنه سائح غني وبيصرف كتير وقت نزوله لأي دولة في العالم والنوع ده من السياحة كل دول العالم بتدور عليه، خصوصا أن سائح عالي الانفاق.

الحكومة ممثلة في وزارة السياحة والآثار بتكون حريصة خلال النوع ده من المعارض علي عقد لقاءات مع منظمي الرحلات اللي بيكونوا مشاركين في المعرض، وبيعرضوا عليهم المنتجات السياحية الموجودة في مصر، ده غير كمان أن الحكومة بتعمل مسابقات واسئلة للحضور عن المعالم السياحية المصري، وبتكون الهدايا عبارة عن رحلات مجانية للفائزين، وبيكون الهدف من النوع ده من المسابقات زيادة تعريف الحضور بالمقاصد السياحية المصرية، والدولة بتعمل حالة من الشغف عن السياحة المصرية.

في الوقت الحالي الدولة بتستهدف زيادة عدد السائحين في مصر لـ30 مليون سائح وتحقيق 30 مليار دولار كايرادات للقطاع في 2028، وفي جهود كتيرة الحكومة بتقوم بيها للوصول للرقم المستهدف ده غير الافتتاح المرتقب للمتحف المصري الكبير واللي هيكون علامة مهمة في زيادة الاقبال السياحي علي مصر.