من ساعات تم الاعلان عن انفراجة كبيرة في أزمة مستحقات شركات النفط الأجنبية .. وده بعد ما الحكومة المصرية نجحت فى سداد 1.2 مليار دولار من مستحقات الشركات دي.. فيا ترى ايه معنى الانفراجة دي ؟ وايه تأثيرها على انتاج حقول النفط فى مصر ؟ وهل ده ممكن يفتح الباب لاكتشافات نفط وغاز جديدة؟ .. ولاّ دي مجرد خطوة عادية ومش هتفرق كتير؟ 

فى البداية كده تعالوا  نفهم إيه اللي حصل .. مصر سددت 1.2 مليار دولار جديدة مطلع الشهر ده لشركات النفط الأجنبية .. دول الشركات اللي بتشتغل في استكشاف واستخراج النفط والغاز في مصر .. يعني بيحفروا ويدوّروا على البترول والغاز في الصحرا وفي البحر .. والفلوس دي كانت متأخرة عليهم من زمان .. يعني زي ما تكون مديّن صاحبك فلوس وأخيراً قدرت تديله جزء منها .. الدفعة دي خلّت إجمالي اللي مصر سددته من يونيو اللي فات لحد دلوقتي يوصل 7.5 مليار دولار.

طب .. ليه الموضوع ده مهم؟

عشان الشركات الأجنبية دي زي إيني وبي بي وأباتشي .. بيحتاجوا الفلوس دي عشان يزوّدوا شغلهم في مصر .. يعني لما تديهم حقهم .. بيبقوا مبسوطين ويحسوا إن شغلهم في مصر فيه أمان .. فيبقوا عايزين يستثمروا أكتر .. يعني يحفروا آبار جديدة .. يدوروا على حقول غاز ونفط جديدة .. وده بيخلّي إنتاج النفط والغاز في مصر يزيد .. وده طبعاً مهم جداً للاقتصاد.

خلونا نركز شوية على الوضع دلوقتي .. إنتاج الغاز الطبيعي في مصر دلوقتي حوالي 4.2 مليار قدم مكعب في اليوم .. بس احتياجات البلد أكبر من كده .. احنا عايزين حوالي 6.2 مليار قدم مكعب يومياً .. وفي الصيف الرقم ده بيوصل 7 مليار .. يعني عندنا عجز في الغاز .. وعشان نغطي العجز ده .. لازم الشركات الأجنبية تزود إنتاجها .. ولما مصر بتسدد مستحقاتهم .. بتديهم دافع إنهم يشتغلوا بقوة أكبر.

بس مش بس كده .. الحكومة المصرية بتحاول تحفّز الشركات دي بطرق تانية .. زي إنها عرضت عليهم إنهم يبيعوا الغاز والنفط للحكومة بأسعار أعلى من اللي متفق عليها .. يعني بدل ما يصدّروا بره وياخدوا سعر السوق العالمي .. الحكومة بتقولهم هاتوا الإنتاج لينا بسعر كويس .. وده بيخلّي الشركات دي تركز على السوق المصري أكتر .. كمان الحكومة عملت جدول زمني لسداد الباقي من المستحقات.. اللي دلوقتي بقى حوالي 3.5 مليار دولار .. وهي خطة هتخلّص في سبتمبر الجاي بدل يونيو زي ما كان متخطط قبل كده .. عشان الحكومة عندها التزامات تانية بره.

طيب إيه تأثير الكلام ده على الاكتشافات الجديدة؟

لما الشركات الأجنبية تحس إن فلوسها بتتدفع في الوقت .. وإن الحكومة بتديهم حوافز .. هيبقوا عايزين يزودوا عمليات الاستكشاف .. يعني يدوروا على حقول غاز ونفط جديدة في البحر المتوسط أو في الصحراء الغربية .. وفعلاً الحكومة طلبت منهم يزودوا التنقيب .. وده ممكن يجيب اكتشافات كبيرة زي حقل ظهر اللي غيّر قواعد اللعبة في إنتاج الغاز قبل كده
المؤكد ان  سداد 1.2 مليار دولار خطوة كبيرة .. بس هي جزء من خطة أكبر .. مصر عايزة تزود إنتاجها من الغاز والنفط عشان تغطي احتياجاتها وتبقى بلد مصدّر للطاقة تاني .. والشركات الأجنبية هما المفتاح لتحقيق الهدف ده .. لما تديهم فلوسهم وتحفزهم .. بيبقوا مستعدين يستثمروا ويزودوا الإنتاج .. وده اللي هيخلّي مصر تقدر تواجه تحديات الطاقة في السنين الجاية.