لو معاك فلوس زيادة أو سيولة ومش عارف تستثمرها إزاي.. هنقولك على أفضل استثمار ممكن يحقق لك مكاسب كبيرة وكمان تخليك رجل أعمال.

لو حاطط فلوسك تحت البلاطة فأنت كده بتخسرها ومع الزمن مش هيبقالها قيمة مع التغيرات السريعة في الوضع الاقتصادي والاسعار والقيمة الشرائية وعشان كده لازم تشغلها في استثمار أو مشروع تحافظ بيها على فلوسك وتحمي تحويشة العمر من ضياع قيمتها الشرائية وفي نفس الوقت تضمن إن فلوسك بتزيد.

الحقيقة في اكتر من فكرة أو مجال ممكن تستثمر فيه فلوسك الزيادة ودا بيعتمد على مدة خبرتك الاقتصادية وطبيعة عملك ووقتك يعني لو ليك خبرة في صناعة أو حرفة معينة هنا هيكون مناسب جدا أنك تشتغل في الحاجة اللي بتفهم فيها عشان متخسرش نتيجة المغامرة لأول مرة في مجال انت مش عارفه وكمان موضوع الوقت مهم جدا لو هتشتثمر فلوسك لأنه هيحدد هل انت هتتابع مشروعك بنفسك ولا فيه حد هيتابعه ولا هتلجأ تحط فلوسك في استثمار سهل وآمن زي شهادات الادخار بالبنوك واللي بيفضلها اغلب الموظفين عشان وقتهم وعشان مكسبها معروف وفلوسهم في الحفظ والصون.

طيب ايه الافضل الدهب ولا العقار ولا الشهادات في الوقت الحالي ؟

الحقيقة مع التقلبات الاقتصادية السريعة في مصر والعالم واللي بيحصل في الأسواق كل ساعة خلي ناس كتير تخاف وتفكر ألف مرة قبل ما تشغل فلوسها في قطاع بعينه زي اللي الجنون اللي بيحصل في سوق الدهب والضبابية في سوق العقارات يعني ببساطة محدش عارف مثلا الدهب رايح على فين لانه كل ساعة بحالة وفي العقار نفس الوضع وفي شهادات الادخار بالبنوك هاجس الفايدة بيخلي الناس تفكر تشغل فلوسها فين وامتي.. يعني في أوقات الأزمات الاستثمار وخاصة الاستثمار الشخصي بيكون محفوف بالمخاطر زي ما بنقول ولازم تختار صح.

طيب خبراء السوق بينصحوا بايه؟

أهل الخبرة بينصحوا بنوعين من الاستثمار في أوقات الأزمات والاضطرابات الاقتصادية أو تقلبات الأسواق منها الاستثمار في الدهب لانه مهما حصل بيفضل محافظ على قيمته في المدى الطويل يعني سعره دايما في الطالع بصرف النظر عن التقلبات اللحظية أو اللي ليها علاقة بقرارات معينة زي قرارات ترامب الأخيرة واللي أشعلت شوق الدهب عالميا ومحليا..

في نفس الوقت لو معاك سيولة زيادة خبراء الأسواق بينصحوك بالاستثمار في مشروع خاص وشايفين إن دا استثمار أهم من الدهب والعقارات وارباحه أكبر من البورصة وشهادات الادخار بالبنوك.. ودا لأن الاستثمارات التقليدية هتحافظ على فلوسك وتديك عليها مكسب اضافي لكن مش هتخليك في يوم صاحب مشروع ضخم وثروة بالملايين ودا اللي ممكن يتحقق بسهولة في الاستثمار بمشروع خاص.

ميزة المشروع الخاص انك بتشرف عليه بنفسك وبالتالي هيتكور بشكل مستمر وكمان انك ممكن تبدأ باي مبلغ ... والأهم إن مشروعك بيكبر ويتوسع مع الايام وطموحك معاه بيكبر والمشروع وعلى فرض ورشة نجارة صغيرة مع الوقت هتبقي اكتر من ورشة وبعدها هتكون مصنع أخشاب والمصنع ممن يكون مجموعة مصانع ودا ممكن يحصل مع المكسب المستمر والتوسع.

باختصار لو معاك فلوس استثمرها في مشروع خاص اولا وفي مجال بتفهم فيه ولازم تتفرغ له وبعدها حط فلوسك في الدهب لانه مش بيخسر في الطبيعي أبدا.